Avannaani inuuneq folketingimi ilaasortat takuniarpaat

Takuniaaneq ullumi pingasunngornermi aallartippoq, politikerillu Pituffimmut, Qaanaamut, Kullorsuarmut, Upernavimmut, Uummannamut, Aasiannut Ilulissanullu ingerlaassallutik.

Takuniaanermi imaani annaassiniarneq aalisartunillu nakkutilliineq sammineqassapput, taamatullu politikerit aammattaaq Kalaallit Nunaanni kommunit allanngortiternerat kiisalu silap pissusaata allannguutaasa kinguneri paasisaqarfigissallugit.

Politikerit Aasianni uuliamik ujarlernermik aallartinneqareersumik ilisimasaqarnerulissapput, angalaneq naammassitinnagu Qaasuitsup Kommuniani borgmesterimik Jess Svanemik ataatsimeeqateqarnermikkut.

Takuniaaneq septembarip 15-iata tungaanut ingerlanneqassaaq. Ataatsimiititaliap siulittaasua Lars-Emil Johansen peqataasinnaanani nalunaarpoq, taamaalillunilu angalaqatigiit maanna aqqaneq-marluupput, Venstreneersoq Britta Schall Holberg siulittaasorigallarlugu.