Avannaani inersimasut nikassaattarnerat akiorniarpaat

Uummannami upernaaq innuttaasunik ataatsimiititsinermi imminut toquttarneq qanoq anigorneqarsinnaanersoq eqqartorneqarpoq. Inersimasut akornanni nakkarsaasoqartartoq ataatsimiititsinermi paasineqarpoq, taannalu qulequtaralugu Uummannami isiginnaagassiortoqarluni.

Qaasuitsup Kommuniata ataani pitsaaliuinermut siunersorti Gerda Fleischer ima oqarpoq:

- Amerlasuut saqqummiinerminni eqimattat eqqaasimavaat nakkarsaaneq ingutsineq assigiinngitsullu tassunga tunngasinnaasut annertuallaartumik atorneqartut, Qaasuitsup Kommuniani pitsaaliuinermut siunersorti Gerda Fleischer oqarpoq.

Uummannami ataatsimiititsisoqarnerani eqimattanngorlutik saqqummiisarput, eqimattallu amerlasuut eqqaavaat inersimasut akornanni nakkarsaasarneq ajornartorsiutaasoq.

- Ajornartorsiut annertusimammat eqimattap ataasinnaanngitsup taanna eqqaanikuaa. Eqimattaniit oqaatigineqartarpoq ajornartorsiut innuttaasunit eqqartorneqarneq ajortoq, Gerda Fleischer oqarpoq.

Isiginnaagassiaq takutinneqareerpat Uummannami innuttaasunik ataatsimiititsisoqaqqissaaq, tassani isiginnaagassiaq qanoq atorneqarsinnaanersoq eqqartorneqassalluni.

Gerda Fleischerip kommunit allat oqallissaarummik isiginnaagassiornissaat innersuussutigaa.

- Innersuussutigisinnaaqaara. Nalunngilara allat kommunit taama ittunik suliaqarusuttartut. Isiginnaagassiat oqallitsisinnaasut inuiaqatigiinni iluaqutaasorujussuussapput, aamma pinaveersaartitsinermut atorneqarsinnaagami. Taamaattumik innersuussutigisinnaavara sakkussat pissarsiarisinnaasagut atorluarnissaannut aamma tassunga tunngagami, Gerda Fleischer oqarpoq.

Isiginnaagassiaq Inuit Theatre Company-mit suliarineqarpoq.