Avannaani aasamut ulapaartoqaqqissaaq
Takorlooriaruk Kangaatsiaq, 400-nik innuttaqartoq, ukiumi ataatsimi pilersorit. Aasammi ingerlanerinnaani Aasianniit uuliasioqatigiiffik Cairn Energy, sutigut tamatigut taama annertutigisumik Aasianniit pilersorneqarpoq.
Ukiuni tulliuttuni uuliasioqatigiiffissuit arlaqartut nunatta sineriaani misiliillutik qillerilersussaapput. Nunatsinnut minnerunngitsumillu Qaasuitsup kommuneanut aningaasatigut iluaqutaassappat misilittagaareersunik aaqqitassat amerlaqaat, taama oqarpoq, Qaasuitsup Kommuneani imaani uuliamik ujaasilluni qillerinermi ataqatigiissaarisoq, Hans Peder Balach Christensen:
- Aasarmanna pisut takorluukkatsinnit annertunerunerisa kinguneraa, suliassat ingerlanneqarnerisa nalaani sullissinitta qanoq pitsanngorsarnissaanik ilinniarfigiutigalugit ingerlatsigatta, taamaattumik nunami sullinneqarnerata annertunersua tupaallaatigalugu sullissinerput ingerlapparput, Hans Peder Barlach Christensen oqarpoq.
Aasap ingerlanerani qillerivimmi sulisut 400-it paarlakaallutik ulloq unnuarlu sulisinneqarsimapput, taakkulu Aasiannut tikittarput unnuisarlutillu. Siunissami sulisartut amerlissappata piareersimaffissat aamma amerlapput:
- Apeqqutaavoq sumi qillerinerit ingerlanneqassanersut. Immami suliassartaa eqqarsaatigalugu, illoqarfinni unnuisarfeqarnissaq piareersimaffigineqartariaqarpoq, pingaaruteqarnerpaavorlu umiarsualiveqarnerup aammalu containerinik ilioraaveqarluarnissap piareersimaffigineqarluarnissaa.
Aasap ingerlanerani Cairnip talittarfimmik atuinera ilimagisamik annertuneruvoq, tassami umiarsuit talittartut sapaatip akunneranut 25-it missaaniissimapput. Qillerivimmi sulisunut Aasiannullu tikittartunut kiffartuussineq, sutigut tamatigut ingerlanneqarsimavoq, tamatumalu kinguneraa illoqarfimmi aningaasat kaaviiaartitat 12 million koruunit missaannik amerlariarsimaneri:
- Sulllissinerit annertusaraanni ilimagilluinnarpara suli iluanaarutaalluarsinnaasut. Nammineerlunga eqqoriarsinnaavara aappaagumuinnaq piareersaasiorluarutta, illoqarfitsinni aningaasat kaaviiaartitagut 15-18 million koruuninik qaffanneqarsinnaasut, Hans Peder Balach Christensen taama oqarpoq.
Uuliasioqatigiiffissuit angisuut siunissami sullinneqarnerisa pitsanngorsarnissaa anguniarlugu, Qaasuitsup Kommunea suliffeqarfiillu sullissereersut peqatigiillutik pitsanngorsaatinik oqaloqatigiissapput:
- Decembarip ingerlanerani suliffeqarfiit oqaloqatigisussaavagut, aappaagumut sullissinerit qanoq pitsaanerusumik ingerlanneqarsinnaaneri aammalu qanoq pitsaanerutigisumik isumaqatigiissusiornissarput oqaloqatigiissutigissallutigit. Aamma Namminersorlutik Oqartussat kommunimiit oqaloqatigineqassapput, ilinniartitseqqiinerit qanoq ililluta annertusarsinnaanerlutigit.
