Avannaani aalisartut siunnersuutaat tigulluarneqartoq

 SQAPK-miit siunnersuutigaarput aalisarnermut aqutsiveqarfiit ullumikkut pingasuinnaasut sisamanngorlugit ilaneqarnissaat. Qeqertarsuullu tunuata kujammut killeqarfiata avannamut illuarneqarneqarnissaa siunnersuutigaarput, SQAPK sinnerlugu siunnersuuteqartoq Erik Lange oqarpoq.
 
Taassuma taama siunnersuuteqarnerminut pissutaatippaa qaleralittassanut pisassat paggatiinnarlugit aalisarneqartanerat.
 
- Aqutsiveqarfiup iluani umiatsiaararsorlutik aalisartut ullumikkut 370-upput. Pisassamininnguillu taassuma iluaniittut paggaterujussuarneqartarlutik. Taava aqutsiveqarfiup kujammut killeqarfiata avannamut illuarneratigut umiatsiaarasorlutik aalisartut 123-it killeqanngitsumik aalisarsinnaanerminnut periarfissaqarlissapput. Sinneruttut umiatsiaararsorlutik aalisartut 247-ut killilerfiusumi ullumikkutut ingerlaannarnissaat siunnersuutigaarput, Erik Lange oqarpoq.

Aalisarneq pillugu isumasioqatigiinnissaq erinitsaatigineqartoq ullumi aallartissaaq

Aalisarnermut Naalakkersuisoq Finn Karlsenip Erik Langep siunnersuutaa tapersersorpaa. Inatsisartunullu siunnersuutiminut assingutillugu.
 
- Tassa Naalakkersuni Erik Langep saqqummiussaasa ilaat suliarereerparput. Massakkut Inatsisartunut siunnersuutigineqarput. Siunnersuutinnut ilaatigut assingusorujussuupput, Aalisarnermut Naalakkersuisoq Finn Karlsen oqarpoq.
 
SQAPK sinnerlugu ataatsimeersuarnermi saqqummiussisup Erik Langep Finn Karlsenip siunnersuutaa pillugu tusaramiuk neriuuteqarluarpoq.
 
- Soorunami neriulluarnarpoq siunnersuuterput Naalakkersuisup suliaanut qanissimammat. Soorunami neriulluarnanngitsuunngilaq arlaatigut taassuma angusaqarfiunissaa, pitsaasumillu takutitsiffiulluni pitsaasumik inerneqarnissaa, SQAPK sinnerlugu ataatsimeersuarnermi saqqummiisoq Erik Lange oqarpoq.
 
Sinerissap Qanittuani Aalisartut Piniartullu Kattuffiat, SQAPK ukiup ataatsip matuma siorna pilersinneqarpoq.