Avannaa sinersortaateqalersinnaavoq tapiisoqassappat

apriilip 10-at 2007 14:31

Namminersornerullutik Oqartussat ukiuni tulliuttuni arfineq marlunni katillugit 82 million koruuninik aningaasaliissuteqarsinnaappata, avannaani Ilulissaniit Upernavik ilanngullugu, umiarsuarmik sinersortaammik angallassisoqarsinnaalissagaluarpoq. Taama oqarpoq taama sinersortaasiinissamut neqerooruteqartup Disko Line A/S-p pisortaa Ole Dorph. Namminersornerullutik Oqartussat tapiissuteqarnissaat pisariaqarluinnartoq Ole Dorph oqarpoq:

- Sivisuumik nalilersuinerit kisitsisillu kingullit tunngavigalugit Namminersornerullutik Oqartussat 2007-miit 2014-imut ingerlasussamik sullissinermut isumaqatigiissuteqarfigiumallugit qinnuteqarsimavugut. Sullissinermut isumaqatigiissut aallarnerlugu ukioq manna 13 million koruunit qinnuteqatigineqarput. Ukiuni tulliuttuni tapiissutit ikiliartuaartinneqarnissaat Disko Line A/S-mit siunertarineqarpoq.

Ukiut ingerlanerini aqqutip takornarianit aningaasalersorneqalernissaa anguniagaavoq.

Sinersortaatissatut pilersaarutaasumi bilitsinut akit marloqiusanngorlugit immikkoortitaassapput; upernaakkut ukiakkut taavalu aasaanerani akinut.

Assersuut:

Ilulissaniit Uummannamut siumuinnaq upernaakkut ukiakkullu akit naapertolugit 400 koruuneqartassaaq, aasaaneranilu 800 koruuneqartassalluni.

Disko Line umiarsuarsinissamut tuniniaasumit ullumi ulloqeqqanut killissalerneqarsimavoq. Namminersornerullutillu Oqartussat suli akinngimmata suliffeqarfik umiarsuarmik tuniniaasoq attaveqrfigissagitsik, ullunillu marlunnik tuneqqussallutik, Ole Dorph oqarpoq.

Qinnuteqarnertik Namminersornerullutik Oqartussanit taperserneqassanngippat suna tamarmi qatagiinnartariaqassasoq erseqqissaatigaa.

Ole Dorph oqarpoq qinnuteqaatit neqeroorutillu tamarmik inissilluassappata angallassinissartik upernaaru maajip 28-ianniit aallartilluni ukiaru septembarip naanissaata tungaanut ingerlanissaa pilersaarutaasoq.