Avannaa kujataalu sapaatip akunneri marluk aatsaat qaangiuppata atassusersinnaassapput
Ikaartarfik nunaqarfiup kujataanik avannaanillu atassusiisoq pingasunik toqqavillip marlunnillu ikaartarfittallip ilaa kuup erngata qaffakkiartorneranik kuuguusaapput.
Ikaartarfiup toqqavii sioqqanik betonimillu immiinnarlugit aaqqiivigineqarsinnaanngimmata, ikaartarfiugallarsinnaasumik Danmarkimi sanaajusumik tikisitsisoqartariaqarpoq.
- Isumaqartoqaraluarpoq sioqqanik betonimillu kueraaginnarluni aaqqiisoqarsinnasoq, taamaaqqajanngilarli, kuugussaaginnavissammata, Fritz Baumann Petersen oqarpoq.
- Ikaartarfivissamik sanasoqannginnerani utaqqiisaagallartumik ikaartarfiliortoqartariaqarpoq, Fritz Baumann Petersen, Qeqqata Kommuniata Kangerlussuarmi ingerlatsinermut akisussaasorititaa erseqqissaavoq.
Taassuma naatsorsuutigaa ikaartarfiup toqqavissai septembarimi oktobarimiluunniit, kuukkunnaamippat, aatsaat sananeqarsinnaassasut.
- Taamaattumik utaqqiisaagallartumik ikaartarfeqartariaqassaaq, Fritz Baumann Petersen oqarpoq.
Kangerlussuarmi eqqagassanik isumaginninneq aamma eqqugaavoq, eqqaavissuaq nunaqarfiup kujataaniimmat.
- Nunaqarfimmi eqqagassat amerliartuinnartut sumut igikkallarneqartarnissat pillugit aaqqiissutissarsiortariaqarpugut, eqqagassat aatsaat ikaaruteqqaarlugit iginneqarsinnaasarmata, Fritz Baumann Petersen. Kangerlussuaq mittarfeqarmat utaqqiisaagallartumik eqqaaveqarnissaq immikkut piumasaqaatitaqassaaq.
- Nunaqarfiup eqqaani utaqqiisaagallartumik eqqaaveqalernissamik pisortanut immikkut akuersissummik piniartariaqassaagut, Fritz Baumann Petersen erseqqissaavoq.