Avanersuarmiut qilalugartassinneqaqqikkumapput
- Uummannap Kommuneani qilalugartassiissutit amerlineqassappata uaguttaaq Avanersuarmi qilalugartassavut amerlisinneqartariaqarput, Qaanaami Inuit Ataqatigiit sinnerlugit kommunalbestyrelsemi ilaasortaq Naimanngitsoq Petersen taama allappoq.
Avanersuarmi qilalugartassiissutit maanna tamakkerneqarsimanersut suli erseqqivissumik paasineqanngikkaluartoq Naimanngitsoq Petersen oqarpoq, siorna pisassat sinnerneqarsimammata ukioq manna pisassiissutinut ilanngaatigineqarsimasut, tassa 100-nit 75-inut ikilineqarlutik.
- Siusinnerusukkut kissaatigisimavarput Qaanaap saniatigut Qimusseriarsuarmi pisassiisoqarnissaa, Uummannamisorluinnaq Qaanaap kangerluani qilalugarpassuaqartarmat, qitiusumit sukumiisumik ilisimaneqanngitsunik. Naimanngitsoq Petersen erseqqissaavoq.
Avanersuarmi maanna kaperlappoq sikoqqallunilu, tamannalu pillugu qilalugarniarneq uninngavoq, kaperlalli sioqqullugu qilalugaqarluarsimammat Naimanngitsoq Petersen-ip qilalugartassat tamakkerneqarsimanissaat immaqalu sinnerneqarsimanissaat ilimagaa oqarlunilu sippuisoqaqqissimassappat aappaagu qilalugartassat suli ikinnerulernissaat naatsorsuutigisariaqartoq.
