Avanersuarmiut akuersaarneqanngillat
Avanersuarmi piniartut piniarfitoqqaminnik tassa Uummannamik utertitsiniarnerminnut sorsuuteqarnerat ajornakusooqqilerunarpoq, tassami europami inuit pisinnaatitaaffii pillugit eqqartuussiviup tamanna akuleruffigiumanngikkaa, aviisip Politikenip ullaaq manna allaaseraa.
Taama aalajangertoqarnera pillugu, eqqartuussisup illersuisuusup tamanna Inuit pisinnaatitaaffii pillugit eqqartuussivimmut naammagittaalliutiginialersaaraa aamma eqqaaneqarpoq.
Danskit eqqartuussiviata avanersuarmi piniartoqarfiusimasumit Uummannamit 1953-imi pinngitsaalillugit nuutitaasimasut massuaataat siusinnerusukkut ilumoornerartuartarpaa.
Taakku nuutitaasimapput 100 kilometerinik ungasinnerusumiittumi amerikamiut sakkutuui timmisartoqarfiliorniassammata. 1999-imilu Østre Landsrettip pinngitsaalillugit nuutitaasimasut 1,7 millioni koruuninik taarsiivigai. Eqqartuussiviulli kissaatiginngilaa, tassani najugaqarsimasut kissaataattut taakani najugaqartoqaqqilernissaa.
Tamannalu eqqartuussiviit qullersaqarfianiit 2003-imi atortussaalersussatut aalajangiunneqarpoq. Tamatuma kingorna avanersuarmiut inuit pisinnaatitaaffiisa illersorneqarnissaat pillugu eqqartuussivimmut tamanna naammagittaalliutigaat, pigisaminnik arsaagaasimasutut innimiilliorfigineqarsimasutullu tamanna isigalugu.
Maannali tassa aamma paasinarsivoq, inuit pisinnaatitaaffii pillugit eqqartuussiveqarfiup tamanna akuerinngikkaa, ”peqqutissaqanngitsutut” isigalugu.
Politikenillu allaaserisaa naapertorlugu, tamanna suliassanngortinneqarsinnaanngilaq.
