Avanersuarmi pitsaaliuilerput
Pitsaaliuinermut siunnersorti, Tukummeq Henson, Qaasuitsup Kommunianit Qaanaami ungasinngitsukkut atorfinitsinneqarpoq, Pitsaaliuinermullu suliani kommunimi pisortaq, Helga Nielsen, suleqatigalugu kommunip avannarpasinnerusortaani, aamma nunaqarfinni Qeqertani Siorapalummilu, pitsaaliuinermi suliat sapaatip-akunnerini tulliuttuni marlunni annertusassavai.
Kinguaassiuutinik inuusuttunut ilinniartitsineq, qinngasaarisarneq pillugu oqallitsitsinerit, ilaqutariinni nerisassat peqqinnartut pillugit saqqummiinerit aamma innuttaasunik ataatsimiititsinerit, pitsaaliuinermik suliallit arnat taakku marluk Qaanaami nunaqarfiinilu marlunni sisamanngorpat marsip 17-ianniit qaammatip naajartornerata tungaanut sammissavaat.
Tamakku saniatigut Qaanaami ilaqutariinnut sullissiviliortoqarnissaanut periarfissat Helga Nielsenip aamma oqallisigitissavai, meeqqanik inuusuttunillu nakkutiginnilluni pigaartoqartalernissaq (Natteravne) pillugu aamma ataatsimiititsissalluni. Pigaartartut tassaassapput inersimasut, namminneq piumassutsiminnik aqqusinerni nakkutilliisartut, inuusuttunik ajornartorsiuleriataarsinnaasunik oqaloqateqarnissaminnut piareersimasartussat.
Pitsaaliuineq pillugu Helga Nielsenip Tukummeq Hensonillu sapaatip-akunnerini marlunni sammisaqartitsinertik marsip 29-anni naggaserlugu Qaanaami ingerlatsivinnik namminersortunik ataatsimeeqateqassapput, taakku akornanni pitsaaliuineq pillugu attaveqarfissanik pilersitsinissaq neriuutigalugu.
