Avanersuarmi piniartut aningaasarsiorfissaqalerput

Qaanaap kommuniata aningaasatigut ajornartooruttorfiata nalaani Qaanaami innuttaasunut aningaasarsiorfissaasinnaasumik Nukik Seafood pilersitsivoq.

Nukik Seafoodip umiarsuaataasa ilaat Arctic Pioneer ukioq naallugu Qaanaap nunaqarfiisa ilaanni Savissiviup saavani qaleralinnik tunitsivigineqarsinnaassaaq. Umiarsuaq maanna Savissiviup saavaniippoq sikoriarpallu qimussimik angallavissaaleriarpat piniartut umiarsuarmut qaleralinnik tunisaqarsinnaalissapput.

- Nukik seafoodimiit ukiut marluk missaani piareersareerlugu umiarsuaq Arctic Pioneer Savassiviup eqqaani qaleralinnut tunitsivigineqarsinnaalersipparput, tassani suleqataapput Polar seafood, Greenland A/S kiisalu KNI Pilersuisoq A/S, Nukik Seafoodip pisortaa Petrus Biilmann oqarpoq.

Taanna aperaarput Qaanaap eqqaani piniartut kikkulluunniit tulaassinissamik periarfissaqarnersut.

- Aap, Qaanaap kommuniani kikkulluunniit ukioq naallugu ukiuunerani sikukkut qaleralinniarlutik aalisarusuttut tulaassisarsinnaapput, oqarpoq.

Apereqqippugut pisat qanoq ilillugit kujammut assartorneqartassanersut.

- Umiarsuaq sikuernissaata tungaanut Savissivimmiissaaq taavalu naammasseriaruni nammineerluni kujammukaatissavai nassiussiffissanullu usingiariartorlugit, Petrus akivoq.

Iluanaarutaalluarsinnaasorineraa aperaarput.

- Nalunnginnatsigu ukiuunerani sikukkut aalisarnerminni qaleralittartut taava takorusupparput ukiuunerani sikukkut qanoq annertutigisoq pisarineqarsinnaanera. Pilersaarutinummi ilaammat ilumut qaleraleqarluarsimassappat taava Savissivimmi tunitsivimmik qerititsivimmik annertunerusumik pilersitsisinnaaneq eqqarsaatigigatsigu, oqarpoq.

Taanna erseqqissaavoq siullerpaamik ukiuunerani taamak avannarpasitsigisumi taamatut misiliissallutik.

Petrus Biilmann aperaarput avanersuarmiut ulluni makkunani assut aningaasaqarnermikkut ajornartorsioqisut ikiorserniarlugit taamatut aaqqilersaarsimanersut.

- Taamani ukiut marluk matuma siorna tamanna pilersaarutigalugu aallartikkatta naluarput avanersuarmiut aningaasaqanermikkut ajornartoorumaarnersut. Neriuutigeqaarpulli piniartut uani periarfissinneqarnertik atorluarlugu aningaasarsiorluarumaartut taamaalillutik kommunertik aamma ikiorsersinnaassammassuk,

Nukik seafood-ip pisortaata Petrus Biilmannip Qaanaap eqqaani Upernaviullu avannaani najugallit aamma kajumissaarpai umiarsuarmut piumagunik tunisisaqqullugit.