Pituffiup eqqaani timmisartorsuup qaartartorsuarnik usisup 1968-mi nakkarnerata kingornagut, nuna nakkarfiup timaaniittoq Narsaarsuk aamma mingutsinneqarsimasoq siornaak 2003-mi misissuisoqarmat aatsaat paasineqarpoq. Tamatumunnga atatillugu Amerikamiut oqartussaat qanoq piniarsut Danmarkimi illersornissamut ministerip paasiniarsimanerlugu? Taama apeqquteqaateqarpoq nunarput sinnerlugu Folktingimi ilaasortap aappaa Kuupik Kleist Inuit Ataqatigiinneersoq. Kuupik Kleistip taama apeqquteqaateqarnini ima tunngaveqartipaa:
- Ilumoorsinnaanngilaq, massakkut ukiut 40-nngulersullu nunaminartamik mingutsitsisoqarsimaneq aatsaat paasineqarmat. Taamaattumik apequtigaara amerikamiut siusinnerusukkut misissuisimasinnaanerat ilisimaneqarnersoq. Ilumut nassaartoqarsimanersoq kisianni isertussamik. Taamaattoqarsimassappat saliinissaq nukingernarnerulissaaq annertunerulerlunilu. Ajornartorsiutinngoqqajaasutummi aarleqqutigisinnaavarput Danmarkip saliinissamik USA neriorsorsimappagu aningaasartuutissarpassuartigullu imminut nammagassinnermigut saliinissamut tunuarsimaalersimalersimassappat.
Illersornissamut ministeri Søren Gade iliuuseqassanngippat tamanna aamma ajornartorsiutinngorsinnaasoq Kuupik Kleist oqarpoq oqarlunili akinissaminut sapaatip akunnera missaani piffissaqartoq.
- Soqutigisarput tassaavoq tamakkiisumik paasitinneqarnissaq ukiorpassuarnini piumasaqaat tamanna nunatsinniniit Danmarkimiillu saleeqataasimasunit saqqummiunneqartarsimavoq mannali tikillugu qinngornernik ukorianartunik qinngorfigitittoqarsimanersoq suli uppernarsarnerusussimanngilaq.
Risømi ilisimatusarfiup saqqummiussai uppernarsaataasut Kuupik Kleist tikkuaavoq.
- Taamattumik allat missuisimasinnaanerat aamma paasineqartariaqarpoq. Imaassinnaavormi Narsaarsummi nassaarnerup saniatigut allanik aamma nassaartoqarsimasinnaavoq.
Kuupik Kleistip taamaattoq neriuutiginerarpaa allanik mingutsitsisoqarsimannginnissaa.
- Kisianni taamaassimappat statsminerip uannut neriorsuisimanera naapertorlugu piaarnerpaamik saliisoqarumaartoq.
Kuupik Kleist isumaqarpoq saliineq aqaguluunniit aallartinneqarsinnaasoq.