Avanersuarmi kanngussannik kuultinillu piaanissamik periarfissat missorneqarput

Kanngussak kuultilu nunatta avannaarsuani ukiorpaaluit qaangiuppata piaarneqalersinnaavoq, tamanna Nunamineralsimi misissukkat kingunerannit takussutissaqarpoq
Allattoq Jaaku Lyberth
marsip 03-at 2011 17:59

Nunamineralsiminngaanniit aatsitassanik ujarlertut timmisartumit uuttortaareermata Inglefieldimi tassa avannaarsuani Qaqqaatsumik taasartagaanni misissuinerminni paasivaat kanngussannut kuultinullu ujarlernissamik siorna periarfissaqartoq.

- Saviminissaqarfimmik ujarlerluta misissuinerit ingerlappagut kisianni imatut annertoorsuarmik saviminissaqarfimmik nassaanngikkaluarluta nuna tamanna kanngussannik tamakkununngalu assigisaanik periarfissagissaartoq paasivarput, Nunamineralsimi pisortaq Ole Christiansen oqarpoq.

Aatsitassanik piiaasoqarnissaa qaqugu ingerlanneqarsinnaanersoq Ole Christiansenip oqaatigisinnaannginnerarpaa.

Aatsitassaqarfiusinnaasumik nassaarnerit iluatsissappata ukiorpaaluit ingerlareerpata kanngussammik kuultimillu piiaanissaq piviusunngorsinnaasoq erseqqissaatigaa.

- Kuultinik kanngussannillu piiaaffiusinnaasutut periarfissagissaarnera Qaqqaatsumi misissuinitsinni paasivarput, Ole Christiansen oqarpoq.

Nunap pissusaanik uuttortaanerit ingerlanneqareerpata qillerisoqareerlunilu qanoq aatsitassaqartiginera sukumiinerusumik paasineqassaaq.

Aatsitassaqarneranik misissuilluartoqaqqereerpat aatsitassaqarfiillu nassaarineqareerpata kikkut aatsitassanik piiaalersinnaaneri eqqartorneqassaaq.