Ombudsmandi Vera Leth Avannaata Kommunianut isornartorsiuingaatsiartoq.Assi: Merete Lindstrøm

Avanaata Kommuniata suliaq sivisuallaartumik suliarigaa

Angajoqqaajusup meeqqami avataanut inissinneqarsimasup angerlartinniarnerani itigartinneqarnermini suliaq ukiuni tallimani utaqqisariaqarsimavaa. Tamannalu ombudmandip naammaginartinngilluinnarpaa.

Angajoqqaajusup meeqqami aqqaneq marlunnik ukiullip angajoqqaajusup akuerisaanik angerlarsimaffiup avataanut inissinneqarsimasup angerlartinneqarnissaanut qinnuteqarneratigut 2013-imi suliaq Qaasuitsup Kommuniani aallartinneqarpoq. Angajoqqaaminulli uternissaanik kissaat Avannaata Kommunianit ukiut tallimat qaangiutillartut meerarlu 18-inik ukioqalinngitsiartoq itigartitsissutigineqarpoq.
- Isumaqarpunga piffissamik suliamik suliarinninnermut atorneqartoq pissutissaqanngiivissumik sivisullunilu isorisariaqarluinnartoq, ombudsmandi Vera Leth oqarpoq.

AAMMA ATUARUK Meeqqap innarluutillip ikiorserneqarnissaa pillugu suliaq sakkortuumik isornartorsiorneqartoq

Kommunimi ilaqutariinnermut ataatsimiititaliap suliap ingerlarnga tulluusimaarutiginngilaa.

- Suliaq 2013-imiit 2018-imut aatsaat naammassineqarpoq. Imaappoq qiningaaffik pitarlugu suliaq ingerlanneqarsimanera akueriuminaatsorujussuuvoq uaguulluni. Kisianni tassa akisussaaffik uanniippoq, Avannaata Kommuniani ilaqutariinnermut ataatsimiititaliami siulittaasoq, Apollo Mathiassen oqarpoq.

Suliat tuaviuunneqarnerusariaqartut

Meeqqap angerlarnissaa siullermi aggustimi 2013-imi qinnutigineqarpoq, Kommunili angajoqqaaq aappassaaneerluni februaarimi 2014-imiqinnuteqaqqimmat aatsaat qisuariaateqarpoq. Suliarlu tamatuma tungaanut arlaleriarlugu uninngassunneqartarsimavoq, tamannalu ataatsimiititaliami siulittaasup tusaaniarneranut pissutaavoq.

- Kisianni qujanartumik suliaq naammassineqarpoq, naak tulluusimaarutigerutiginngilluinnaraluarlugu suliap taama sivisutigisumik ingerlanneqarsimanera, Apollo Mathiassen oqarpoq.


Ilaqutariinnermut ataatsimiititaliami siulittaasoq Apollo Mathiassen, suliap taama sivisutigisumik suliarineqarnera tulluusimaarutiginngilluinnarpaa.

Suliap ukiup tallimat ingerlanneqarsimanera ombudsmandip akuerineqarsinnaanngilluinnarpaa.

- Isumaqarpungattaaq suliat, meeqqat angajoqqaaminnik najugaqateqarnissaminnut periarfissaannut tunngasut immikkut pilertussuseqartumik suliarineqartariaqartut, Vera Leth oqarpoq.

Suliat sivisunerpaamik sapaaatit akunnialuisa iluanni sivisunerpaamilluunniit qaammatit arlaqanngitsut ingerlaneranni naammassineqareersimasartut, taanna isumaqarpoq.

Suliat sukkanerusumik suliarineqarsinnaanissaanut periusissiortoqartoq

Avannaata Kommuniani sulianik taama ittunik naammattuuisoqaqqinnginnissaa anguniarlugu periusissiortoqartoq, Apollo Mathiassen erseqqissaavoq.

- Suliassaq taama ittoq peqqinnginniassammat periusissamik najoqqutassamik iliusissatut atugassamik atorfillit malitassaanik sanavugut nutaanik taamaammat taamaattut suliassamik takkuttoqaraangat ingerlaannaq suliniutit aallartinneqartarnissaat anguniarlugu.

AAMMA ATUARUK Pisortat paamaarussinerat sullinneqartut unittuussutigisarpaat

Suliami ilungersunartunik kukkusoqarsimallunilu sumiginnaasoqarsimasoq suliarlu ilungersunartupilussuusoq ombudsmandi isornartorsiutimini inerniliivoq. Taamaammat suliaq Inatsisartut inatsisinut ataatsimiititaliaannut kommunalbestyrelsimullu kalerriissutigaa.

- Ilisimatissimasakka tassanngaanniit namminneq isummerfigissavaat suliaq naalakkersuinikkut qanoq malitseqartitsivigissanerlugu, Vera Leth oqarpoq

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat