Avammut tuniseqqusiunnaarneq piniartunut eqquissaaq
CITES-imi isumaqatigiissut atuuttoq soqutigisatsinnut naapertuutissappat nalilersoqqinnissaa pisariaqarpoq, taama oqarpoq Ole Heinrich Piniarnermut aalisarnermullu pisortaqarfimmi siunnersorti.
Nannut avammut utaqqiisaasumik tunisassiareqqusaajunnaarnerat naalakkersuisut aalajangerpaat. CITES-imik isumaqatigiissut uumasunut nungutaanissaminnut ulorianartorsiortinneqartunut tunngassuteqarpoq, Aalisarnermut Piniarnermullu Pisortaqarfimmiit paasissutissat malillugit nannut taamatut oqaatigineqarsinnaanngillat.
Imminut nammassinnaasumik uumasuuteqarnissap qularnaarnissaa anguniarlugu Canada/Nunavut peqatigalugu ataatsimoortumik ingerlatsinikkut isumaqatigiissuteqarnissaq Aalisarnermut Piniarnermullu Pisortaqarffimmiit sulissutigineqarpoq.
Nannut amiinik nannunillu pinnersaasianik avammut tuniseqqusiunnaarneq apriilip aallaqqaataanit atuutilissaaq, tamatumalu kingorna ammaanneqaqqinnissaa pillugu siunnersuusiortussanik suleqatigiissitaliortoqassaaq. Avammut tunisaqaqqittalernissap angunissaanut suliniutisat suut pisariaqarnersut pillugit suleqatigiissitaliat nassuiaasiussapput, matumani ilanngullugit aningaasarsiornermut tunngasut, aammalu piffissaliussassat.
