Avaleraasartuut pillugit misissuinissaq ammanerulersitsissaaq

Ukioq manna avaleraasartoortassanik agguaassinerup, Namminersorlutik Oqartussat avataannit misissuisartuinit misissorneqarnissaa, Peqquserluttuliornermik akiuiniarnermut suliniaqatigiiffiup, Transparency Greenlandip nuannaarutigaa.

- Agguaassinermi suut piumasaqaataanersut suullu malittarisassaanersut ammasumik nalunaarutigineqarnissaat amigaatigisimavarput. Taamaattumik tamassuma maanna misissorneqalernera iluarisimaarparput.

Transparency Greenlandip siulittaasua, Anita Hoffer oqarpoq.

Aamma atuaruk Avaleraasartoortassanik agguaassineq Transparencyp oqaaseqarfigaa

Namminersorlutik Oqartussat avataannit misissuisartuinit agguaassinerup misissorneqarnissaa, KNAPK-mit isornartorsiorneqarluni apeqquserneqartoq, Transparency Greenlandip isumaqatiginngilaa.

- Misissuisussat arlaannaannulluunniit attuumassuteqannginneri iluarisimaarparput tassami taakku avataannit takusatik allaavigalugit misissuisussaapput. Taamaattumik Namminersorlutik Oqartussat namminneq misissuisartuinit tamanna ingerlanneqartussaq paasilluarsinnaavarput.

Anita Hoffer oqarpoq imalu nangilluni.

- Neriuutigiinnassavarpulli avaleraasartuunik siunissami agguaassisarnerit tunngaveqarluartunik pitsaasumillu ingerlariaaseqarlunilu suliarineqartalissasut. Aamma neriuutigaarput misissuisinneqartut ammasumik periuseqarlutik misissuiumaartut taamaalilluni peqquserlunneq aallaaviginagu pisassiisoqartarnissa anguneqassammat.

Transparency Greenlandip siulittaasua, Anita Hoffer oqarpoq.

Inatsisartut aalisarneq pillugu ataatsimiititaliaata siulittaasua, Nikolaj Jeremiassen oqarpoq, misissuisitsinissaq pillugu ataatsimiititaliaq qanittukkut ataatsimiikkumaartoq.