Avaleraasartuut akitsuuserneqarnissaat ataatsimiititaliami avissaartuutsitsisoq

Akitsuutissatut siunnersuutip partiinit amerlanerusunit tapersersorneqarnissaa kissaatiginartoq, atatsimiititaliap siulittasuata Jens Immanuelsenip tunngavilersuutigaa.

Inatsisissatut allannguutissatut siunnersuutip ullumi aappassaaneerlugu oqaluuserineqannginnerani, Inatsisartut Aningaasaqarnermut Akileraartarnermullu ataatsimiititaliap pingaartillugu innersuussutigaat, avaleraasartuunik iluaquteqarniarneq inuiaqatigiit aningaasaqarniarnerannut sapinngisamik annertunerpaamik iluaqutigineqarsinnaanngornissaa.

Taama aalajangernermi ataatsimiititaliamit immikkut isiginiagassat pingaartitaallu immikkoortut assigiinngitsut sisamaapput, ukuusut:

1. Nunatsinni suliffissaqartitsiniarnerup tunisassiorfinnilu piginnaasanik ineriartortitsinerup annertunerusumik siuarsarneqarnissaa.

2. Nunat allamiut aalisariutaannik isumaqatigiissuteqarnerni, sapinngisamik annertunerpaamik pisaqartarnissap qulakkeerneqarnissaa.

3. Aalisakkanik pisuussutit Nunatsinni inuiaqatigiinnut aningaasaqarnikkut sapinngisamik annertunerpaamik iluanaarutaanissaa.

4. Siunissarlu qanittoq isigalugu, akitsuutinik 90 million koruuninik iluanaarutissatut missingikkat akitsuuseeriaatsikkut pisariaqanngitsumik ajorseriartinneqannginnissaat.

Inatsisartut Aningaasaqarnermut Akileraartarnermullu ataatsimiititaliaata taama tunngavilersuineri, Aningaasaqarnermut Nunamullu Namminermut Naalakkersuisup, Vittus Qujaukitsup nuannaarutigalugit oqaatigaa neriorsuillunilu, Naalakkersuisut aalisarnermi akitsuutinik aaqqissuusseqqinnissaannut, ukioq manna pisussamut, avaleraasartoorniarnermi misilittakkat aningaasatigullu angusat ilanngunneqarumaartut.

Ataatsimiititaliami ilaasortat ikinnerussuteqartut, Inuit Ataqatigiit tamatumunnga isumaqataannginnerminnut ilaatigut oqaatigaat, isumaliutissiissummik suliaqarnerup ingerlanneqarnera annertuumik isorineqartariaqartoq, aalajangerniarnermullu atatillugu oqallinnissaagaluaq peqqissaartumillu inatsisissamik suliarinninnissaagaluaq, Naalakkersuisooqatigiit amerlanerussuteqarnermikkut mattussimammassuk.