Avaleraasartuunut akitsuut piumasarineqartumit minnerulersinnaalluarpoq.

Isumali tamanna piviusunngussappat, Inatsisartut Aningaasaqarnermut Akileraartarnermullu ataatsimiititaliaani ilaasortat amerlanerpaat isumaqatigiinnissaat pisariaqarpoq, taama oqarpoq ataatsimiititaliap siulittaasua, Jens Immanuelsen Siumut.

- Ataatsimiitialiami illuatungiliuttunit akitsuutip mikinerunissaanik piumasaqaataat eqqarsaatigalugu aammalu akitsuusiinerup annertussusissaanik upernaaq manna oqallinnerup kinguneranik maanna periarfissaasoraara, akitsuutip millineqarluni naaperiutigineqarnissaa. Maanna akimik ataatsimik eqqaasaqanngikkaluarlunga, qanoq isumaqatigiittoqarnissaa, Inatsisartuni pingajussaaneerlugu oqallisigineqannginnerani. Aningaasaqarnermut Akileraartarnermullu ataatsimiititaliap siulittaasua, Jens Immanuelsen taama oqarpoq.

Qalerallit avataasiorluni aalisarnermi pisarineqartut akitsuutaat, Inatsisartut inatsisaata allanngortinneqarnissaanut siunnersuutip, Inatsisartunut ilaasortanit ippassaq aappassaaneerlugu oqaluuserineqannginnerani, Aningaasaqarnermut Akileraartarnermullu ataatsimiititaliap pingaartillugu innersuussutigaat, avaleraasartuunik iluaquteqarniarneq inuiaqatigiit aningaasaqarniarnerannut sapinngisamik annertunerpaamik iluaqutigineqarsinnaanngussasoq.

Inuiaqatigiinnullu tamanna iluaqusiinerussappat, aalisariutaatillit akitsuummik kiilumut 1 koruunit 50 oorimik artukkernagit, akitsuut minnerpaamik 60 øreqartariaqartoq, ataatsimiititaliami ikinnerussuteqartut, Inuit Ataqatigiit siunnersuutigaat.

- Nunatta isumalluutigisinnaasaannut akitsuusiinissaq isumaqatigaarput, isumaqatiginngisarpulli tassaavoq, avaleraasartuunut pisarineqartunut akitsuummik qaffasissusiliineq nalaatsornerinnarmik aningaasartalerneqarmat. Taamaattumik ataatsimiititaliami eqqartorneqarpoq akitsuut tulluarsarneqartariaqartoq, tassami akitsuut 1 koruunit 50 oorilu siunnersuutigineqartoq isumaqatiginnginnatsigu tamassuma appartinneqarnissaa siunnersuutigigaluaratsigu. Aningaasaqarnermut Akileraartarnermullu ataatsimiititaliami Inuit Ataqatigiit sinnerlugit ilaasortaq, Naaja Nathanielsen oqarpoq.

Taassumali ataatsimiitialiami amerlanerussuteqartut, Siumukkut Atassutikkulu isumaasa allanngorsimannginnissaat uppernarseqqaarusuppa.

- Ataatsimiititaliap ullumi naapinneranni suut siunnersuutit qaqinneqassanersut ilisimanngilara. Suliaq aallartimmalli isumaqatigiinnissarput neriuutigisimagaluarparput, ilaatigut avaleraasartoornianermut attuumassuteqartut tusarniarneqarnissaat anguniarsimallutigu aamma Aningaasaqarnermut Naalakkersusoq oqaloqatigerusussimagaluarlutigu, taamaattoqarsimanngilarli, Naaja Nathanielsen oqarpoq.

Avaleraasartoornianermi pisarineqartut akitsuutissaata appartinneqarnissaanik Inuit Ataqatigiit siunnersuutigisaat qanilliartorneqarsinnaalluartoq, Aningaasaqarnermut Akileraartarnermullu ataatsimiititaliap siulittaasuata, Jens Immanuelsenip oqaatigaa.

- Tassa ataatsimiititaliami ilaasortat tamatta isumaqatigiissinnaagutta, tamanna inuiaqatigiinnut peqqinnarnerpaassooq, tassami Nunatta ajunnginnerpaamik sullinneqarnissaa tamatta kissaatigaarput. Aningaasaqarnermut Akileraartarnermullu ataatsimiititaliap siulittaasua, Jens Immanuelsen taama oqarpoq.

Inatsisissatut allannguutissatut siunnersuut, Inatsisartunut ilaasoratanit pingajussaaneerlugu juunip aallartinnerani oqallisigineqassaaq.