Avaleraasartuunik aalisarnissaq pilerigineqarluartoq
Avaleraasartuut Nunatta imartaani pisarineqartartut Nunatta iluani tunisassiarineqartalersinnaanerat anguniarlugu Naalakkersuisut qanoq pilersaaruteqarpat?
Inatsisartuni ilaasortaq, Anders Olsen, Siumut, Naalakkersuisunut paragraf 37 malillugu taama apeqquteqaateqarpoq.
Avaleraasartuunik misiliilluni aalisarneq siorna iluatsittoq innersuussutigalugu Anders Olsen apeqquteqarpoq.
Anders Olsenip apeqquteqaammini tunngavilersuutinut ilannguppaa aalisakkat taakkua avammut tuninerini akitsuutitigut Nunatta Karsiata aningaasarpassuarnik isertitsissutiginissaasa missingiunneqarsimanerat.
Avaleraasartuunik aalisarnerup suliffnnik amerlasuunik pilersitsisinnaanera Anders Olsenip neriuutigaa, assersuutigalugu, Tunumi Kujataanilu suliffinnik pilersitsisinnaammat.
Aviisimi Sermitsiami, tallimanngormat saqqummersumi, allaaserisaq naapertorlugu avaleraasartuut ukiormannamut aalisagartassiissutigineqartut 60.000 tonsiusut qinnutigineqarnissaannut aalisariutaatillit amerlapput.
Aalisarnermut Piniarnermullu immikkoortortami pisortaq, Emanuel Rosing, taama ilisimatitsivoq.
Aalisariutaatillit avaleraasartuunik katillugit 288.000 tonsinik aalisarsinnaajumallutik qinnuteqarput - tassani aalisagartassiissutigineqartut sisamaariaataannik amerlanerusunik.
Aalisarnermut pisortoqarfimmit erseqqissaatigineqarpoq avaleraasartuut ukiormanna aalisagartassiissutigineqartut Nunatsinni aalisartut kisimiillutik aalisartussaanngimmatigik.
Aalisarnermut unammilligassat ilagaat Kalaallit Nunaanni kilisaatit avaleraasartoorniarsinnaasut naammattut pigineqannginnerat.
- Avaleraasartoorniarnermi atortut raajarniarnermi atortorineqartunit allaanerujussuit atorneqartarput
- Taamaattumik aalisagartassiissutigineqartut tamakkerneqarnissaannut nunat allamiut aalisariutaannik attartorsinnaaneq akuersissutigineqartariaqassaaq, Emanuel Rosing aviisimi Sermitsiami apersorneqarluni oqarpoq.
