Avaleraasartoorniarneq pillugu isumaqatigiissut IA-p Atassutillu pakatsissutigigaat

Avaleraasartoorniarneq pillugu EU-mi nutaamik isumaqatigiissuteqartoqarsimanera Inatsisartuni tamaginnit mamiatsaatigineqarlunilu pakatsinartinneqarpoq.
marsip 21-at 2014 04:29

Ane Hansenip Inuit Ataqatigiinneersup Savalimmiormiut, EU aamma Norge avaleraasartiorniarneq pillugu imminnut iluaqutissaq kisiat siunertaralugu isumaqatigiissuteqarnerat, peqatigitillugulu Kalaallit Nunaannik avaleraasartoorniarnermut mattussiniarpalaartumik iliuuseqarnerat tupaallaatiginerarpaa

Inuit Ataqatigiit taamatut isumaqatigiissuteqarneq Kalaallit Nunaannut pitsaasuunngilluin-nartoq akuersaarsinnaangilluinnarpaat.

Pingaartumillu Savalimmiut isumaqatigiissummut ilaanerat pakatsinartippaat, pingaartumik Kalaallit Nunaata Savalimmiut aalisarnikkut soqutigisaannik nalinginnaasumik tapersersuisarnera eqqarsaatigalugu.

Sara Olsvig: Avaleraasartuut pillugit isumaqatigiissut kalaallit soqutigisaannut naapertuutinngilaq

IA aamma isumaqarpoq pisariaqassappat Kalaallit Nunaata EU-mik aalisarnermik isumaqatigiissuteqarnera ilanngullugu nalilersorneqartariaqarpoq, pisorlu Nalagaaffeqatigiinnut tamanut ajornartorsiutinngorartarsinnaasoq.
 
Taamaammat Naalakkersuisut isumaqatigiissummut piaarnerpaamik avoqqaarliuteqassasut Inuit Ataqatigiinnit kaammattuutigineqarpoq.
 
Atassutittaaq avaleraasartoorniarneq pillugu isumaqatigiissutaasoq uissuummissutigineqarpoq. Aammattaaq IA-tulli Savalimmiut isumaqatigiissummut peqataanerat pakatsissutigineqarpoq.
 
- Eqqaasitsissutigiinnassavarput Savalimmiormiut imminnut ammassassuarnik pisassissimanerat pissutigalugu EU-p Savalimmiut mattummagu Nunatta Savalimmiut tapersingaarnikuummagu, massakkullu Savalimmiormiut qanoq namminissarsiortiginertik nunatsinnillu aammalumi Islandimik suleqatiginninnertik qanoq sumiginnartigisinnaanerlugu uppernarsarpaat, tamannalu ajorluinnarpoq!, Gerhardt Petersen aamma Knud Kristiansen Atassummeersut taama allapput.
 
- Isumaqarpugut Nunatta Naalakkersuisut aqqutigalugit Savalimmiut sakkortuumik isornartorsiortariaqarai, aammalu suleqatigisatut ilumut tatiginartuunersoq apeqquserneqarujussuartariaqartoq!
 
Tamanna tunngavigalugu Atassummit kaammattuutigineqarpoq Naalakkersuisut, Islandip Ruslandillu aalisarnermut naalakkersuisui  avaleraasartuut pillugit suleqatigiinnissaq siunertaralugu piaartumik naapeqatigiinnissaat aqqutissiuunneqassasoq, isumaqatigiissutigineqarsimasut kingunerlutsitsisinnaanera taamaaliornikkut minnerpaaffimiitikkumallugu.