Avaleraasaqqortoorniarujussuarnissaq navianartorsiorpoq
Qaleralinniartartut eqqarsaatigalugit nutaarsiassat nuannersortaqarpallaanngillat. Qalerallit tamakkerneqareersut annikitsunnguaannarmik amerleriassagunarput - imarluttumilu misileraalluni aalisartoqarpoq.
Aalisartulli taakkununngalu naalakkersuisoq, Karl Lyberth, unammilligassaqaraluaqisut, neriuutissaqarunarpoq. Pingaartumik avataani ungasissumi aalisarsinnaasunut.
Avaleraasartuunik Tunup avataani misleraalluni aalisarneq 70.000 tonsinik annertunerusumik pisassinneqarnermik ukioq-manna kinguneqarpoq, Nunattalu karsianut tamanna isertitsiffiulluareerpoq. Avammut tunisanit maannamut 240 millionit koruuninik immikkut isertitsissutigineqarlutik. Sermitsiami, ippassaq saqqummersumi tamanna allaaserineqarpoq.
Avaleraasartuut kiilumut 6 koruunit missaannik akeqarput, pisassiissutigineqartullu ukioq-manna tamakkerneqassappata, ½ milliardit koruuninik akileraarutitigut nutaamik isertitsissutaasinnaassapput.
Avaleraasartuut saniasigut ammassassuarniarneq aallartinneqarsinnaasoq Karl Lyberthip neriuutigaa. Taamaammat 10.000 tonsinik ammassassuartassanik pisassiisoqarpoq - misileraatitut aamma eqqarsaatigineqartumik.
Avaleraasartuunik ammassassuarnillu Nunatsinni aalisarneq annertusiartussanersoq suli nalorninarallarpoq - apeqqutaavoq aalisartut suliffeqarfissuillu taakkunannga aalisarnermut aningaasaleerusussanersut - aningaasaleerusuttummi maannamut amigaatigineqanngeqaat. Polar Seafood, Royal Greenland, Samilik, Ice Trawl, Qaleralik aamma Jakob Petersen maannamut avaleraasartoornialereerput.
Avaleraarsartoorniarnerli aalisartut kisimik soqutiginninnerannik pissuteqanngilaq, nunalli allat, Atlantikup Avannaani avaleraasartoorniartartut allanillu aalisartartut aamma apeqqutaapput, Kalaallit Nunaannimi tamakkorniartarnissaq taakku akuerissaneraat aamma apeqqutaavoq. Danmarkimi tunisassiorfiit ilaat, Danmarks Pelagiske Producentorganisation, maannamut akerlileereerpoq:
- Kalaallit Nunaata imartaani avaleraasartoorniarneq annertusiartorpoq. Ukiuni marlunni avaleraasartoorniartoqarsimanera pissutigiinnarlugu sinerissami naliliinissaq siusippallaartoq uagut isumaqarpugut. Qanoq avaleraasartooqartiginersoq, avaleraasartuullu qanoq siaruarsimatiginersut, naliliitinnata paaserusupparput, pisortaq Esben Sverdrup-Jensen, Sermitsiamut oqarpoq.
Sinerissami naalagaaffiit, ammassassuarniarlutillu avaleraasartoorniartartut, Londonimi sapaatip-akunnerata tulliani ataatsimiissapput, Kalaallit Nunaat aalisakkanik taakkuninnga aalisarneq annertusineqarsinnaanersoq oqaluuserissallugu.
