Avalanneq immikkoortitsinermik kinguneqartarpoq
Qallunaatut piginnaasaqarneq kikkut Qallunaat Nunaannukarnissaannut aalajangiinermi tunngaviunerpaasarpoq. Meeqqat aamma qallunaatut ilikkapallassinnaaneq piginnaaneqarfigisariaqarpaat, sukkanerusumik ilinniagaqarsinnaaqqullugit.
Meeqqat ilai 5. 6. aamma 7. klasset Qallunaat Nunaannut nassiunneqartarput, ukioq ataaseq realskolernissaminnut piareersarfigissallugu.
1966-imiit 1971-imut meeqqat realskolessagunik taamaallaat Qallunaat Nunaanni ukeeqqaarlutik aatsaat realskolemut isersinnaapput, realskolerniaraanni Kalaallit Nunaanni piareersarfiusumik atuarfeqanngimmat. Meeqqallu Kalaallit Nunaannut utertussat neriulluarfigineqaqaat.
-Tassami naatsorsuutigineqarpoq kalaaliaqqat qallunaat inooriaasianik, oqaasiinik kulturianillu sunnerneqarnertik iluaqutigalugu, Kalaallit Nunaanni qallunaanngorsaanermut iluaqutaasumik sunniuteqassasut, Qallunaat Nunaatami anguniagaraa Kalaallit Nunaat qallunaanngorsarneqassasoq, Christian Ydesen nassuiaavoq.
Meeqqat Danmarkimut assingusumik Kalaallit Nunaanni inuiaqatigiinni pisuunngorsaaqataallutillu siuarsaaqataassapput. Pilersaarulli kusanaqisoq piviusunngunngilaq.
-Akerlianik avissaartuuttoqarpoq, ilinniartitaanerup aaqqissuusaanera meeqqat piginnaasaqarnerat, ilaatigut aallaaviginngivillugu immikkoorsitsinertut ilusilimmik aaqqissugaanera pissutaalluni. Taamaalilluni kalaaliararpassuit Qallunaat Nunaannukartinneqarnissaminnut pikkunnaateqaraluartut tiguneqanngitsoortarlutik, Christian Ydesen, Ph.D-liamini ukioq manna kingusinnerusukkut naammassisussami naggasiivoq.
