Avalammi siulersuisut kattuffiup siunissaa ernumassutigaat
Ilinniarneq Pillugu Pilersaarusiap nutaap atuutilersinneqarnissaa kalaallit Danmarkimi ilinniagaqartut Kattuffiata ernumanartoqartippaa. Avalammut ilaasortaanermi qaammammoortumik akiliutaasartoq 50 koruuni ingerlaannartumik ullumikkut ilanngaatigineqartarpoq.
Kattuffiulli ilaasortai 570-it missaanniittut namminneerlutik Avalammut qaammammoortumik siunissami akiliutigisalissavaat. Ilinniagaqartut taamaaliortarnissartik ajornakusoortissagaat Avalammit ernummatigineqarpoq.
- Ernummatigaara kattuffipput aningaasatigut ukiortaamiit ajornartorsiulissasoq. Amerlasuunik aalajaatsunik ilaasortaqaraluarluta ikinngitsut qaammammoortumik tapiutigisartakkamik ingerlannissaat ajornakusoorutigissavaat, kattuffimmi isumaqatigiinniartartoq, Gerth P. Olsen, oqarpoq.
Ilinniagaqarnersiuteqartitsivik, Kulturimut Ilinniartitaanermullu Ataatsimiititaliaq, aamma ilinniagaqartunut Nuummi kattuffiit Avalammit sapaatip-akunnerani uani tikeraarneqassapput, ajornartorsiut ilaatigut saqqummiutissallugu.
Ilaasortaanermut akiliutit kattuffiup ataatsimiinnerinut assigiinngitsunut ilaasortallu katerittarnerinut atorneqartarput.