Avalak nittartagartaarpoq
Nittartagaq Danmarkimi ilinniartunut Nunatsinnilu inuusuttunut tulluarsagaavoq. Tassanissaaq suliffeqarfiit allallu Kalaallit Nunaat pillugu soqutiginnittut paasissutissanik aallersinnaapput. Nittartakkami paasissutissat nutarternissaat assersuutigalugu suleqatigisat nutaat pillugit kiisalu inuusuttut Danmarkimi nunanilu allani ilinniagaqartut misigisaat allaaserineqartassallutik.
- Pisariaqartutut isigaarput tamatuma pikkoriffiginerunissaa siunissamullu suleriaasissatsinni tamanna ilaavoq. Ilinniagaqartut taamaatiinnartut amerlavallaarsimapput ajornartorsiutit annikikkaluit allisoortarmata. Nittartagarput atorlugu tamakku annikillisarnissaat siunniupparput, Avalammi siulittaasoq Hans Peder Kirkegaard KNR.gl-mut oqarpoq.
Paasissutissat oqitsut oqimaatsullu nittartakkamut ikkunneqarput. Soorlu sikkilitaarnissamut ilitsersuutit, aqqutit ingerlaarfiit kiisalu qanoq ililluni kiserliorneq nikallunganerlu pinngitsoorneqarsinnaanersut. Tassa paasissutissat angerlarsimaffimmiit ungasissumi najugaqarallarnermi toqqissisimanermut iluaqusiisinnaasut.
- Suliffeqarfiit pillugit aamma nittartakkami suliaqarsimavugut. Taakku attavigisinnaavaatigut ilisimatillutalu sulisut sunik piginnaasallit sulisussarsiarerusunnerlugit. Tassami angerlarniarneq oqinneruvoq suliffissaqareeraanni. Imarisai allat tassaapput Danmarkimi nunanilu allani ilinniagaqartut misigisagaat. Neriuutigaarput nittartagaq atorlugu oqilisaaqataasinnaalluta, Hans Peder Kirkegaard oqarpoq.
