Avaartaalluni Kalaallit Nunaanni puisinniartoqartalernavianngilaq

Naalakkersuisut siulittaasuata Hans Enoksenip atorfilittani ippassaq peqquai nunarsuarmiunut erseqqissaqqullugu avaartaalluni puisinniarneq nunatsinni atugaalernavianngitsoq.

Tamanna Inatsisartut oqaluttarfiannit oqaatigaa.

Hans Enoksen partiminit Siumumit IA-millu qisuariaqqulluni qinnuigineqarami tassuuguinnavik qisuariarpoq, Sermitsiamit taama allaaserinnittoqarpoq.

- Matumuuna atorfilittakka naalakkerpakka piaartumik nunarsuarmioqatitsinnut erseqqissaqqullugu Canada-miutut puisinik toqoraasalernavianngitsugut, oqaluttarfimmiit oqarpoq.

Tamatumunnga tunngaviuvoq Nunatta Ammeriviata naalakkersuisunut qinnuteqaatigisimammagu iluanaarniutigalugu Kitaata sikuata avataani puisinniartalerusullutik.

Matumani pingaarnerutillugu qoorortuut atorniarneqarput, kisianni avaartaatit nangitsissutitut atorniarneqarlutik.

Qinnuteqaat naalakkersuisunit itigartinneqareerpoq, kisianni suleqatigiissitanik pilersitsisoqarpoq, iluanaarniutigalugu puisinniarsinnaanermik misissuisussanik.