Avaannata Kommunia: MitId-taarniartunut ikiuukkusuttoq
Avannaata Kommuniani najugaqaruit MitId-taarnissarnullu ajutooqqallutit, maanna kommunimit ikiorneqarsinnaalerputit.
Nunatta annersaani NemId-miit MitId-mut nunniarneq inuppassuarnut akimmisaartitsivoq.
• Kuisinnermut allangartaq
• Najugaqarnermut uppernarsaat
• Inaarummut naatsorsuut kingulleq akileraartarfimminngaanniit.
• Pas
• Kørekort
Ilaatigut passeqannginneq, biilernermullu allagaqartaqannginneq matumani peqqutaanerpaalluni.
Innuttaasut Avannaata Kommunianiittut, namminneerlutik MitID-taarnissaminnut periarfissaqanngitsunut kommunip Sullissivia aqqutigalugu ikiorneqarsinnaalerput.
Avannaata Kommuniani borgmesteri, Palle Jeremiassen taama oqarpoq.
- Innuttaasut massakkut saaffiginnereersinnaapput, uku nassiunneqartartussaagamik. Soorlu massakkuugallartoq nunaqarfimminngaaniit illoqarfimmut nassiuteqaartarput takkua tassani akuerineqarunik MitId-taarnissaminnut taava inunnut taakkununnga saaffiginnissimasunut utertinneqartartussaavoq.
AAMMA ATUARUK Grønlandsbanken: Pisortat sullissivii MitID-taarniartunut tamakkiisumik ikiuutinngillat
Nunatsinni kommunini tallimaasuni Kommuneqarfik kisiartaalluni innuttaasunik MitID-taarniartunik ikiuinissaminut akuersissummik peqarpoq.
Maannali Avannaata Kommunia innuttaasuminik ikiuinissaminut akuersissummik pissarsinissani utaqqiinnaraa, borgmesteri oqarpoq.
- Akuersissut taanna utaqqivarput massakkut. Kisianni taassuma utaqqinerani illoqarfinni aqutsisut pikkorissarneqareerput, taavalu qanoq suleriusissaminnik ilitsersuunneqarlutik taava massakkut aamma nunaqarfinni allaffimmiut taamatut ilitsersuunneqarlutik ingerlapput.
MitID qarasaasiat atorlugit kinaassutsimut uppernarsaatitut NemID-mut maanna pisoqalisumut sanilliullugu isumannaanerujussuuvoq. Tassami kuisinnermut allangartaq, najugaqarnermut uppernarsaat, inaarummut naatsorsuut kingulleq akileraartarfimminngaanniilluunniit taakku arlaat taamaallaat nassarsinnaavatit.
Nunatsinni inuttaasut 4.900-nit ikinnerunngitsut suli MitId-taanngillat. Taakkunannga affai sinnerlugit nunarfinneersuupput iloqarfinnilu avinngarusimasuneersuullutik.
Nunatsinni aningaaseriviit tamarmik piumaffigineqarput oktobarip 31-iani NemID atorunnaarsereerneqassasoq, tamaanna aamma Grønlandsbankenimut atuuppoq.
MitID-taarniarluni 400 km umiatsiartariaqartoq
NemID-miit MitId-mut ikaarsaarniarneq Kullorsuarmeersumut, Timotheus Petersenimut aamma imaannaasimanngeqisoq KNR-imit oqaluttuaraarput.
Taannami imaatigut 400 kilomiiteri isorartutigisoq umiatsiaqqaarlugu MitId-taariartortaqariaqarsimavoq.
Maannali Avannaata Kommuniani inuttaasunut ikiuisinnaalernisaminnut qaammatip naannginnerani akuerineqarnissartik naatsorsuutigaat.
Massakkulli aallartereersinnaalerlutik, Palle Jeremiassen oqarpoq.
- Taamaattumik innuttaasut nalornigunik ukua piumasaqaataasut allannguutasut malillugit ajornannginnerusumik ikaarsaariarnissaminnut aqqutissiuunneqarsinnaalerput.
NemId oktobarip naanerani atorunnaassaaq. Novembarilu aallartippat MitId tamakkiisumik atuutilersimassalluni.