Automatinik spillertartut ikiliartorput

Spilleautomatit atuisartunut iluanaarutaasinnaasut ikiliartoraluartut, aningaasanoortartut ikigisassaanngillat, naallu aningaasat kaaviaartitat ikiliartorsimagaluartut suli amerlapput.

Marlunngornerup ullaap tungaani spilleautomatit aamma atorneqartorujussuupput. Nuup illoqarfittaani neriniartarfiit ilaanni Café Crazy Daisymi inuit spillerput, malinnaasullu aamma takussaallutik. Taamatuttaaq grillbarit ilaanni Centrum Grillimi spillertoqarpoq. Grill-i mikigaluartoq sisamanik spilleautomateqarpoq, tamarmillu atorneqarput. Spillertunik oqaloqateqarusukkaluarpugut, tamarmilli oqaaseqarumanngillat.

Eqquiniaatitsinermi akileraarutinut inatsit 2003-mi allanngortinneqarmat akileraarutit qaffapput. Automatinut akileraarutit ataatsimut 5000 koruuninik qaffanneqarput, taamaasilluni automatit iluanaarutaasinnaasut 59.000 koruunit 71.000 koruunillu akornanni akitsuuserneqartalerput.

Akileraartarnermut pisortaqarfiup kisitsaatai naapertorlugit 2002-mi automatiniit 154 millioni korunit kaaviaartinneqarsimapput, siornalu 80 milllioner koruunit taamaallaat kaaviaartinneqarsimapput.

Automatinik akitsuutit qaffanneqarmat atuisut ikilisimasut, Hotel Godthåbimi pisortaq Helge Tang oqarpoq.

Taanna aamma oqarpoq pinnguaatinut imigassanullu aningaasat kaaviaartinneqartartut 2000-imili appariartulersimasut.