Autisme ADHD-lu eqquigaangata
ADHD-imik aamma autismemik innarluutilinnut angajoqqaat, PPR-imi atorfillit, ilinniartitsisut, perorsaasut, meeqqanut tapersersortit kiisalu Perorsaanermik Ilinniarfimmi Ilulissani ilinniartut ulluni makkunani pikkorissaqartinneqaleruttorput.
- Assersuutigisinnaavara inuit amerlasuut akornanni paatsoorneqaqqajaaleruni, sujumajunnaartarpoq, nikikkumajunnaarluni isumalulerlunilu. Taavalu soorlu eqqatsinniittut nipangerlutik nakkusserujuulertarput, Lisa Johansen, niviarsiaqqamut aqqalinnik ukioqalertussamut ADHD-qartumullu anaanasoq oqarpoq.
Taannali avatangiisiminit perorsaanerluttutut nalilerneqartutut kisimi misigineq ajorpoq.
- Allatulli angajoqqaajusut uanga aamma nuanniilliuutigisarpara eqqaamiutsinninngaanniit killilerneqartarnerput. Imatut paasillugu uagut soorlu meeqqatsinnut perorsaanerluttutut isiginiarneqartarluta, Paaviaaraq Olsen, niviarsiaqqamut aamma aqqalinnik ukiulimmut ADHD-qartumut ataataasoq oqarpoq.
- Takuneqarsinnaanngilaq autismemik imaluunniit ADHD-mik innarluuteqarnersut. Innarluut ersinngitsuuvoq, meeqqallu nalinginnaasumik isikkoqartarput, kisiannili ersinngitsumik nappaateqarnerminni immaqa naalanngitsutut isigineqarsinnaasarlutik. Taamaattumik angajoqqaarpassuit aliasuutigisarpaat angajoqqaajulluarnertik nappaatip ersinngitsup allatut isikkoqartilersarmagu, Thrine Uhrskov, pikkorissaasoq oqarpoq.
ADHD-imik aamma autismemik innarluutilinnut angajoqqaat kiisalu eqqorneqarsimasunut ulluinnarni suleqataasartut, katillugit inuit 43-it, Ilulissani ulluni makkunani pikkorissartinneqaleruttorput.
Pikkorissartinneqartunut ilaavoq Ellen Faurschou uialu. Taakkua ernerat qulingiluanik ukioqarpoq, ukiullu marluk matuma siorna paasineqarpoq autismemik innarluuteqartoq.
- Pissanganarpoq. 2009-mili aapparalu amigaatinikuungatsigu. Soorunalimi taamani meeqqat nakorsaanniit psykiaterimillu misissorneqarmat autisme pillugu paasissutissat pivagut. Kisianni soorlu amigarlutik, Ellen Faurschou oqarpoq.
Taassuma uiatalu autismemut paasissutissat nittartakkatigut namminneerlutik ujartortarsimavaat. Taamaattumik siullermeerlutik pikkorissaqataanertik pissarsiaqaatigilluarpaat.
- Ullumi aqagulu pisassagut pissangigisorujussuuakka. Ilaqutariit iluanni innarluutilimmik meeraqarneq qanoq sunniuteqartarnersoq eqqartortussaangatsigu, Ellen Faurschou oqarpoq.
Pikkorissaasullumi angajoqqaat perorsaanerluttut isigineqartarnerat ilisarisinnaalluarpaa.
Qallunaat Nunaanni peqatigiiffik Landsforeningen Autisme Nunatsinneersunik ilaasortaqarami Ilulissani pikkorissaanermik aaqqissuisuuvoq.
Autismemik aamma ADHD-mik innarluutilinnut angajoqqaat Ilulissani innuttaaqatiminnut ukiup ingerlanerani paasisitsiniaaniarlutik pilersaaruteqarput.
