Australiami orpippassuarni ikuallarujussuarnerit mianersoqqussutigineqartut

Australiap kangiatungaani orpippassuarni sumiiffinni assigiinngitsuni 100-ni ikuallannerit tamaani qatserisartut qamisaleruttorpaat.

Sapaatillu-akunnerata massuma ingerlanerani anorlernerulernissaa ilimasaarutigineqarmat ikuallannerit siaruaatilertornissaat tamaani oqartussat aarleqqutigaat, innuttaasullu isumannaatsuunissaat aamma ernummatigineqarluni.

Australiami nunap immikkoortua New South Wales Australiami inuttunerpaajuvoq, tamaanilu ikuallannerujussuit anorlernerulersinnaanissaa pissutigalugu siaruaatipallassinnaanissaat qatserisartut oqaatigaat. Illoqarfissuaq Sydney tamaani aamma inissisimavoq.

New South Walesimiinnaq sumiiffinni 70-ini orpippassuit ikuallttoorfiupput, taakkunannga 36-t suli aqunneqarsinnaanatik. Qatserisartut taama ilisimatitsipput.

Tassanngaanniit avannamut Queenslandimi sumiiffinni 50-init amerlanerusuni orpippassuit ikuallapput.

Inuit ikinnerpaamik pingasut sapaatip-akunnerata naanerani ajunaarsimapput.

Queenslandimi inuit 5000-init amerlanerusut angerlarsimaffitsik qimaannartariaqarsimavaat, isumannaannerusumukaanneqarlutik. Australiami nutaarsiassaqartitsivik ABC taama allaaserisaqarpoq.