Australiap akuerseqataanissaa ujartorpaa

Nunat Inoqqaavisa Pisinnaatitaaffii pillugit Naalagaaffiit Peqatigiit isumaqatigiissutaat siorna septembarimi atsioqatigiissutigineqarmat nunanit sisamanit akuersaarneqanngilaq, 143-lli akuersillutik. Australia akuerseqataanngilaq.
Allattoq Mads Lynge
februaarip 16-at 2008 13:34

Nunatsinnit tamanna arajutsisimaneqanngilaq. Inuit Ataqatigiit sinnerlugit inatsisartuni ilaasortaq Asii Chemnitz Narup tamanna pillugu naalakkersuisunut apeqquteqaateqarpoq.

Australiami naalakkersuisut Nunat Inoqqaavisa Pisinnaatitaaffii pillugit isumaat sunnerniarlugu nunatsinni naalakkersuisut iliuuseqalersaarnersut Asii Chemnitz Narupip apeqquteqaatigaa.

Australiap ministeriunerata Kevin Ruddip Australiap inoqqaavinut aboriginalsinut pingasunngormat utoqqatsissuteqareernerata kingorna naalakkersuisut siulittaasuat Hans Enoksen ministeriunermut Kevin Ruddimut inuulluaqqussuteqarpoq, tamannalu tunuliaqutaralugu Asii Chemnitz Narup apeqquteqaateqarluni.

- Australia akerliulluni taasivoq. Taamaammat Australiami naalakkersuisut nalunaarutip akuersaarnissaanut atortuulersinnissaanullu sunnerniassallugit pingaaruteqarluinnartuusoraara. Ilami nalunaarummik akerliujuassappata ministeriunerup utoqqatsernera isumaarutissaaq, Asii Chemnitz Narup, Inatsisartut suleriaasianni paragraf 36 naapertorlugu apeqquteqaammini allappoq.