Australiamiut kujataanut aatsitassarsiorniarput
Australiamiut suna aatsitassaq pilerigineraat Qaqortup borgmesterianut Simon Simonsenimut apeqqutigaarput.
- Aatsitassaq eudialytimik taaneqartartoq taannalu igalaaminernut saviminernullu qerattarsaatitut atugassiaavoq, aatsitassarlu taama ittoq annertungaatsiartuusimavoq taqqamani, Simon Simonsen oqarpoq.
Australiamiut aatsitassamik taama ittumik ukiumut 1 millioni tonsimik annertutigisumik piaasarnissartik naatsorsuutigaat. Simon Simonsenilu aperaarput tamanna annertuallaannginnersoq.
- Taakku paasititsiniaanerat malillugu taamatut oqarsinnaanngilagut, qaqqaq piiaaffissaq annertuutut isikkoqarsinnaavoq, kisianni taakku oqarneratut aatsitassaq piiarniarneqartoq ima annertutigisimavoq allaat ukiut 50-it 100-t tikillugit taamatut piiaaneq ingerlanneqarsinnaasoq, oqarpoq.
Taanna erseqqissaavoq akilersinnaasutut takorloorneqarsimasoq, qalleqqissaavortaaq suli misissueqqissaarnerit naammassineqavinngimmata.
- Kujataanut tamarmut iluaqutaasinnaavoq, inuit 250-it tungaanut sulisinneqarsinnaalissapput, Simon Simonsen naggasiivoq.
Suliaq Namminersornerullutik Oqartussani Aatsitassarsiornermi qullersaqarfimmiit akuersissutigineqaqqaartussaavoq.