Australiamiu aningaasaatilissuaq pinngitsuutinneqarpoq

Australiamiu ujarassiooq aningaasaatilissuarlu Gregory Barnes, maani Kalaallit Nunaanni aatsitassarsiornernut assigiinngitsunut akuusartoq, Australiami juulimi aningaasanik peqquserluuteqarsimaneragaanerminit pinngitsuutinneqarpoq.
juulip 23-at 2010 10:40

Gregory Barnesip aatsitassarsiortitseqatigiiffimmi Kujataani Kangerluarsuup qinnguani qaqqani misissuinissaminut akuersissuteqarfigineqartumi ilaatigut amerlaqisunik aktiaateqarpoq. Aviisimi Sermitsiami ullumi taama allaaserinnittoqarpoq.

Gregory Barnes siusinnerusukkut Kuannersuarni aatsitassanik ujarlernermi akuusarpoq.

Greg Barnes Sydneymi aningaaserivimut eqqunngitsunik paasiuminaatsunillu paasissutissiisimasutut parnaarussassanngorlugu siorna decembarimi eqqartuunneqarpoq. Pissutsit taamaattut Kalaallit Nunaanni misissuinissatut pilersaarutini akuuneranik nalorninartorsiortitsilerput.

Barnesilli tamatuma kingorna suliassaq suliassanngorteqqippaa pinngitsuutinneqarnissanilu piumasaralugu.

Eqqartuussisullu tamatuminnga isumaqatigaat. Eqqartuussisut pingasuullutik tamarmik pinngitsuutitsinissaq piumasaraat, unnerluussisussaatitaasut Barnesip pinerluttuliornermik suliani akuusimaneranut naammattunik uppernarsaatissaqanngitsoq isumaqaramik.