Australiami siallernera kallerneralu nuannaarutigineqartoq

Australiap kujataata kangiani sisamanngornermi kiisami siallerujussualerpoq, orpipassuarnilu ikuallannerpassuit taamaalillutik annikilliallalaarput.

Allattoq Ritzau

januaarip 16-at 2020 10:32

Nutserisoq Hanne Petersen

Siallerujussuarnerali ajornartorsiummik allamik malitseqarpoq, tassami qarsutsisoqarpoq, silasiortoq Jake Phillips oqarpoq.

- Sumiiffiit ilaanni siallerujussuarpoq, allanili siallerpiarani, silasiortoq oqaluttuarpoq.

Australiami silasiortut naatsorsuutigaat, sila ulluni sisamani tallimaniluunniit tulliuttuni unerisimanani siallertassasoq.

Victoriami Melbournemilu ikuallattoqaneranit pujoq ajornartorsiutaareersorlu siallilernerata kingunerisaanik silaannaaq pitsaanerulersimavoq.

Australiami ikuallattoqarnerani inuit maannamut ajunaartut 29-upput, angerlarsimaffiillu 2.500-t ikuallannermit eqqugaallutik.

Australiami nuna Danmarkip angissusaata marloriaataanit anginerusoq ikuallappoq.

Uumassusilerituullu uumasut ikuallarujussuarnerani toqusut milliardiussangatippaat, nutaarsiassaqartitsivik dpa taama allaaserisaqarpoq.