Australiami naartuersittarneq inerteqqutaajunnaartoq
Naartuersittarnermut inatsit unnuaq allannguiffigineqarmat naartuersittarneq inertequtaajunnaarsinneqarpoq.
New South Walesimi 1900-kkunnili naartuersittarneq inerteqqutaavoq - unioqqutitsisumillu naartuersittoqarsimatillugu arnat nakorsallu ukiut qulit tikillugit parnaarussaassutigisarsinnaasimavaat, nutaaarsiassaqartitsivik AFP taama allaaserisaqarpoq.
Inatsilli maanna allannguiffigineqarmat naartorisaq sapaatit akunnerisa 22-anni naartuersittoqarsinnaalerpoq - killissarititaasorlu qaangerlugu naartuersittoqassappat ilaatigut nakorsat marluk akuerseqqaartussaatitaapput.
Nunatsinni naartuersinissamut killissarititaasoq tassaavoq sapaatit akunneri aqqaneq marluk.
Nunatsinnilu 1975-imiilli naartuersittoqarsinnaalerpoq.
Kujataani naartuersittarnermi suli piumasaqaateqartoq
New South Wales naartuersitsisarnermik nunap pillaateqartarnermut inatsisaaniititsisumi, Crimes Actimiititsisuni kingulliuvoq.
Taamaammakkaluartorli Australiap naalagaaffianut ilaasuni allani suli piumasaqaateqartoqartarpoq.
South Australiami arnat tarnikkut timikkullu navianartorsiortutut nakorsamit nalilerneqarnerani imaluunniit meeraq timikkut tarnikkullu annertuumik innarluuteqarpat naartuersinneq aatsaat akuerineqarsinnaavoq.