Australiami ikuallattoqarnerani inuit 240.000-it qimaguteqquneqartut
Victoriami inuttaasut 240.000-it angerlarsimaffimminniit qimagutissasut SMS-ikkut tallimanngornermi nalunaarfigineqarput. Australiami oqartussat tallimanngornermi taama peqqusipput.
Viktoriami kangiani orpikkat ikuallarujussuarput, anorlerpoq silalu kianneruleriartorluni - ikuallannerlu siaruaatilertorluni.
Orpippassuarni ikuallarujussuartoqanerani innuttaasut tuusintilikkaat angerlarsimaffeerupput.
AAMMA ATUARUK Australiap danskit ikuallattumut ikiuunniarnerat qujaannarfigigaa
Ikuallannerit Victoriamut New South Walesimullu anngussimapput, taamaattumik massakkut ikuallanneq annertoorujussuanngorluni, nunami pineqartoq 6000 kvadrat kilometeriuvoq.
- Pisinnaaguit ikuallaffiusumit qimagutissaatit, ungasissumukassanngilatit orpeqarfmmukassanallu, Viktoriami upalungaarsimanermut pisortaq, Andrew Crisp Australiami nutaarsiassaqartitsivimmut ABC-mut oqarpoq.
Taanna aamma oqarpoq, Victoriami innuttaasut 240.000-it angerlarsimaffitsik qimassagaat SMS-ikkut nalunaarfigineqarsimasut.
Aammali New South Walesimi South Australiamilu innuttaasut peqquneqarput angerlarsimaffitik qimassagaat. Innuttaasulli qanoq amerlatiginersut pisortanit suli ilisimatitsissutigineqanngilaq.
Australiami ministeriuneq, Scott Morrison oqarpoq, sakkutuut pinasuartumik ikiuuttussatut piareersimatinneqartut.
John White, nunap ilaani East Gippslandimi ukiutoqqami ikuallattumi, borgmesteriuvoq, taassumalu oqaluttuaraa East Gippslandimi inuttaasut angerlarsimaffitsik qimareeraat.
- Inuit naviattartupput, John White oqarpoq.
AAMMA ATUARUK Uumasut milliardit Australiami orpippassuit ikuallanneranni toqusut
Victoriami sakkortuumik anorlertarluni tallimanngorpat ilanngullugu silarluttuarsinnassasoq, Australiami oqartussat ilisimatitsissutigaat.
Ikuallattoqarnerani inuit ajunaartut manna tikillugu 27-upput, inuillu tuusintilikkaat angerlarsimaffitsik qimareerpaat.
Ikuallannerit oktobarimili aallartimmata Australiami nuna 103.000 kvadratkilometerinit annertunerusoq ikuallappoq. Tassa imaappoq, Australiami nuna ikuallattoq Korea Kujallertut angitigivoq.
Australiap silap pissusia pillugu politikkia pillugu nunarsuarmi illoqarfissuarpaalunni - ilaatigut Sydneymi Melbournemilu - tallimanngornermi ualikkut akerliussutsimik takutitsinissanut pilersaartoqarpoq.
