Austmannadalen nuna eqqissisimatitaq
Sumiiffiup ullumikkutut isikkoqarluni allanngutsaaliorneqarnissaa naalakkersuisut eqqissisimatitassanngortitsinerminni siunertaraat, taamaattorli sumiiffimmi aallaaniarsinnaaneq angalaarsinnaanerlu periarfissaqartillugit. Qoororsuup eqqaatalu kulturikkut oqaluttuarisaanermi nunallu isikkuata pingaaruteqassusia eqqarsaatigalugit Nuummut iluaqutaallualersinnaavoq siunissamilu allanngutsaaliorneqartariaqarluni.
Nuna eqqissisimatitanngortinneqartussaq asseqanngilluinnartuuvoq, nunatamigut assigiinngitsunik asseqanngitsunik qoorortaqarami, qaqqaqarluni, taseqarluni, kooqarluni, qorlortoqarluni, sermersuaqarluni, narsartaqarluni, naasuitsumik sioraqarfeqarluni nunalu allanngorartuartuulluni.
Tamakkua saniatigut nuna tamanna arlalinnik illukoqarfeqarpoq, tassami ukiut akulliit nalaanni qallunaatsiaqarfittut qitiusumik inissisimasimagami. Aammattaarlu siulitta Inuit piniariartarfigisimagamikku.
Eqqissisimatitassanngortitsiniarluni suliniuteqarnermi Attaveqarnermut Avatangiisinullu naalakkersuisoqarfik, Nuup kommunia aamma Nunatta Katersugaasivia Allagaateqarfialu suleqatigiilluinnarput, tamannalu ilaatigut angallannermut, illuaqqanik allanillu sanaartornermut taamatullu tupertorsinnaanermut malittarisassanik imaqarluni.
