AUL tunineqarnera pillugu Hans Enoksen nassuiaateqartussanngorpoq

novembarip 07-at 2005 10:55

Inatsisartut aningaasaqarnermut ataatsimiitiliaa Arctic Umiaq Line-p Arctic Travel Groupimut tunineqarneranut tunngasumik ippassaq ataatsimiinnermi aalajangigaqanngilaq. Aningaasaqarnermut ataatsimiititalimi siulittaasoq Simon Olsen oqarpoq, Ineqarnermut Angallannermullu naalakkersuisuugallartoq Hans Enoksen apeqqutinik arlaqaqisunik isumasioqatiginiarlugu ualimut ataatsimeeqatigissagitsik.

- Ataatsimiinnermi aalajangerpugut apeqqutinik naalakkersuisunut nasitsiniarluta, akissuteqarfigineqareerutta aatsaat aalajangiinissaq nalunarunnaassaaq, Simon Olsen oqarpoq.

Aningaasaqarnermut ataatsimiititaliap Ineqarnermut Angallannermullu naalakkersuisuugallartumut apeqquteqaatigiumasat 15. nit amerlanerupput.

Simon Olsen oqarpoq, apeqquteqaatit suunersut suullu pingaartinnerunerlugit suliaq suli ingerlammat oqaatigisimnnaangikkallarlugit; kisiannili Arctic Travel Groupip nunatsinni timmisartuussisalerpat Air Greenlandimut qanoq sunniuteqarnissaa kiisalu umiarsuit nunaqarfinnut anginerusunut tikittannginnissaat apeqqutiqaatigiumasat ilagigaat:

- Air Greenlandip nunanut allanut timmisartuussinera unammillerneqalertusaavoq. Aningaasatigut angusaqaatitigullu qanoq inissisimalernissaa paaserusutatta ilaagaat.

Simon Olsen aamma oqarpoq nunaqarfinnut Arsummut, Qeqertarsuatsiaanut Kangaamiunullu kiisalu Qeqertarsuarnut umiarsuarnik tulattoqartannginnissaa pillugu paaserusutaminnik ingerlatitseqqinniarlutik.

Aninngaasaqarnermut ataatsimiititaliap Hans Enoksen ualeru ataatsimeeqatigissavaa.