AUL soraarsitseqqippoq

Arctic Umiaq Line soraarsitsiniarluni ullumi nalunaaruteqarpoq. Piginneqatigiiffiullu umiarsuaataasa pingasuusut ilaat ataaseq tuniniarneqarpoq.

- Ukioq naallugu umiarsuaatitta marluusut sinersortarnissaat sulisuttalu ukioq naallugu suliffeqarsinnaanerat taamaaliornikkut qulakkeerniarsaraarput, siulersuisut siulittaasortaavat Vagn Andersen taama oqarpoq:

- Umiarsuit marluk ukioq naallugu sinersorsinnaanerat anguniarlugu periarfissanik ujaasivugut. Imaassinnaavoq umiarsuit arlaat namminersortunut tunisariaqassagipput, tamannali suli nalunarallarpoq aamma sulisutta ukioq naallugu suliffeqarsinnaanerat massakkut nalunarallarpoq taamaattorli periarfissarsiuussivugut, Vagn Andersen oqarpoq.

Periarfissanilli ujaasineq sivikitsuarsuuvoq.

- Sapaatip-akunneri marluk periarfissaqarpugut. Umiarsuaatitsinnik pisissallutik soqutiginnittut pisereernermi kingorna aappaagu aasakkut imaatigut angallassinerit pilersaarusiornissaannut aamma periarfissaqartariaqarput, Vagn Andersen Per Jensenimut taama oqarpoq.

Arctic Umiaq Linep amigartoorutai katillutik 30 million koruunit missaaniissangatinneqarput. Arctic Travel Groupip umiarsuit utertinngitsiarlugit Arctic Umiaq Linemi sulisut 40-t soraarsisimavai, siulersuisunilu siulittaasup ullumi nalunaarutigaa soraarsitat 15-inik ilaneqartussanngortut.

Arcitic Umiaq Linemi sulisut 56-t sinnerutissapput.