AUL piserusuttunit neqeroorfigineqarpoq
Namminersornerullutik Oqartussat ullumikkut Arctic Umiaq Linemik piserusuttumit neqeroorfigineqarput. Angalatitsiveqatigiiffiup nutaap, Arctic Travel Groupip, siulersuisuini siulittaasup tamanna uppernarsarpaa.
Angalatitsiveqatigiiffiup pisinissaminut neqeroorutimi immikkuualuttut isertuuppai, pisinissarli imminut akilersinnaasoq qularinngilaa. Neqerooruteqarsimassanngikkaluarpugummi imminut akilersinnaanngippat, Arctic Travel Groupimi siulittaasoq, Poul Lübbert taama oqarpoq:
Arctic Umiaq Linep pisiarinerata kingorna siunissami imminut akilersinnaasoq neriuutigaarput, taama Arctic Travel Groupimeersoq Poul Lübbert oqarpoq. Qanoq neqerooruteqarnerlutik oqaatigiumanngilaa:
Maannangaaq neqeroorutigissatta immikkuualuttortai taajorsinnaanngilakka. Neqeroorupput Namminersornerullutik Oqartussanit nalilersorneqaqqaassaaq. Imaassinnaavoq neqeroorutitsinnit allaanerujussuarmik isumaqatigiissuteqartugut.
Neriuppungali Namminersornerullutik Oqartussat isumaqatigiissuteqarfigisinnaallutigit Kalaallit Nunaanni imaatigut angallanneq uninnginniassammat, Poul Lübbert oqarpoq.
Isertuutinngilaalu suliffeqarfimmik ukiumut 50 millioninik taperneqartartumik pisinissamut aningaasat katersorniarneri imaannaanngitsuusimasoq:
Namminersornerullutik Oqartussanit ukiumut 50 millioninik taperneqartartoq pisiariniarlugu imaannaanngitsuuvoq pisinittami kingorna nammineq tapiiffigineqarata qanoq iluanaarutigisinnaassanerlutigu eqqarsaasersuutigisimagatsigu.
Poul Lübbertip takornariartitsinerup iluaqusiisinnaassasoq.
Siunissami takornariat amerliartornissaat ilimagaarput taamaattumik iluanaarutiginissaat neriuutigalugu taakku kiffartuunniarpagut, taama Arctic Travel Groupimeersoq Poul Lübbert oqarpoq.
Angalatitsiveqatigiiffik maanna pisortatigoortumik piginneqatigiiffittut Inuussutissarsiutinut Ingerlatsivinnullu Aqutsissoqarfimmi allanneqarpoq Nuummilu Qullilerfik 2-mi angerlarsimaffeqartinneqarluni.
Namminersornerullutik Oqartussat siulersuisoqarnermut allatseqarfianit oqaaseqartitsisinnaasimanngilagut.
