AUL pillugu isumaqatigiinniarnerit ingerlaannarallassapput

Arctic Umiaq Linep tunineqarnissaanut Namminersornerullutik Oqartussat danskillu suliffeqarfiussuata Arctic Travel Groupip isumaqatigiinniarnerat sapaatip akunnerata tulliata aallartinnera ilanngullugu ingerlassagunarput, isumaqatigiissuteqarnissamut sapaat siusinnerusukkut killigitinneqaraluartoq.

- Isumaqatigiinniarnerit ingerlaqqinnissaat illuatungeriit isumaqatigiissutigisinnaappassuk, tamanna ajornaquteqanngilaq, Siulersuisunut Naalakkersuisut Allaffeqarfianni immikkoortortami pisortaq, Anders Blaaberg Radioaviisimut oqarpoq.

Isumaqatigiinniarnermi ajornartorsiortoqarnersoq Anders Blaabergip oqaaseqarfigerusunngilaa.

Aningaasarliorneq pissutigalugu Air Alpha danskit suliffeqarfiussuanniit ippassaq tunuarpoq.

- Taama alloriarnerput pissanganartortaqanngivippoq, suliffeqarfimmi pisortaaneq, Thorkild Videbæk, oqarpoq.

- Tunuaraluarluta Arctic Travel Group sullittassallugu ilimagaarput, Videbæk naggasiivoq.