AUL-ip tunineqarnissaa pillugu Air Greenlandip Hans Enoksenillu assortuunnerat suli ingerlavoq

Arctic Umiaq Linep tunineqarnissaa pillugu Air Greenlandip Namminersornerullutillu Oqartussat akornanni suli aaqqiagiinngittoqarpoq.

Naalakkersuisuugallartut siulittaasuat Hans Enoksen Radioaviisimut ullumi oqarpoq Air Greenlandip neqeroorfigineqarsimannginneranut peqqutaasunut ilaasoq, nunatsinni imaatigut angallannermik Air Greenlandip kisermaassilluni ingerlakkusullugu nalunaaruteqarsimanera.

- Imaatigut angallanneq kisermaassilluta ingerlanniarlugu nalunnaruteqarnikuunngilagut, AUL-imuna aningaasaqarnera kisitta misissorusullugu nalunaaruteqartugut, neqeroorusiorniassagatta.

- Tamanna iluarinngilarput, periuserineqartoq apeqqusertaratsigu, Flemming Knudsen oqarpoq.

Naalakkersuisuugallartut siulittaasuat tusagassiutitigut nalunaarpoq Air Greenlandip aamma Royal Arctic Line-p pisisussatut toqqarsimannginnerannut arlalinnik peqquteqartoq.

Naalakkersuisuugallartut allat takornariarnermut angallannermullu ingerlatsilernissaat unammilleqatigiinnissarlu kissaatigaat.

Air Greenlandip pisiarinnittusarsiuussinermi peqataanerata kingunerisaanik namminersortut allat tunuarsimaarnissaat annilaangassutigineqarpoq.

Namminersornerullutik Oqartussat suliffeqarfiutiginngisaannut tunisiniarneq ajorinnginnerpaa?

- Ajorinngilarput unaliuna ajorigipput: piginneqatigiiffik ingerlanerliuleraluarpat atuisussat eqqorneqartussaapput. Assersuutigiinnariartigu Air Alpha.

Hans Enoksenip tusagassiutinut nalunaarutaani allassimavoq Inatsisartut Aningaasaqarnermut Ataatsimiitsitaliaata tamarmiusup Naalakkersuisuugallartut Arctic Travel Groupimut tunisiniarnermik aalajangernerat tapersersoraa.

Flemming Knudsen tamatumunnga pakatsivoq, oqarluni, taama aalajangerneq ajuusaarutigiinnassagitsik.

Air Greenlandili Arctic Umiaq Linemik piginneqataalernissaminut suli neriuuteqarpoq.

- Piginneqatigiiffimmik piginnittut eqqarsarluaqqissaarnissaat neriuuteqarfigaarput, ullunimi kingullerni pisut eqqarsaatigalugit suli pisisinnaanitsinnut periarfissinneqarnissarput neriuutigigatsigu, Flemming Knudsen oqarpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat