AUL-ip tunineqarnera pillugu ataatsimiinnermut Hans Enoksen takkutinngilaq

Arctic Umiaq Linep danskit piginneqatigiiffissuannut, Arctic Travel Groupimut, tunineqarneranut atatillugu, Aningaasaqarnermut Ataatsimiititaliaq nalunaaquttap akunnerata ataatsip matuma siorna – tassa nalunaaqutaq arferngup qeqqanut – ataatsimiilerpoq.

Arctic Umiaq Linep tunineqarnissaanik Naalakkersuisut inassutaat Inatsisartut Aningaasaqarnermut Ataatsimiititaliaata akuersissutigissaneraa ataatsimiinnermi aalajangiisuusinnaavoq.

Umiarsuaatileqatigiiffiup tunineqarnissaanut apeqqutit annertuut imartuullu 15-it Ataatsimiititaliap apeqquteqaatigai, Naalakkersuisuugallartullu siulittaasuata, Hans Enoksenip, Ataatsimiititaliaq peqatigalugu maanna tassa misissuataartussaagaluarpaat.

Kalaallisut Radioaviisi naammasseqqammersorlu Per Skaaning Demokraatineersoq Rdioaviisimut ilisimatitsivoq, oqarluni, ataatsimiinneq naammassisoq, angusaqaratilli.

Hans Enoksen piffissaq kingullerpaaq atorlugu aggersinnaajunnaarluni nalunaarsimavoq, Aningaasaqarnermullu Ataatsimiititaliap apeqqutit allakkatigut nassiunneqarsimasut kisiisa toqqammavigisinnaalerpaat.

Aqagu ualikkut nalunaaqutaq tallimanut kingumut ataatsimiittoqassaaq.

Aviisi AG aqagu saqqummertussaq naapertorlugu, apeqquteqaatit 15-it teknikkimut tunngassuteqarnerupput.

Per Skaaning Demokraatineersoq AG-mut oqarpoq, apeqqutit taakku naammaginartumik isumaqatigiissutigineqassappata, Arctic Umiaq Line-p tunineqarnera akuersissutiginiarlugu. – Suliaq aallartereersimaganni aamma inaarsarneqartariaqarpoq, Per Skaaning oqarpoq.

Akissutilli tamakkiisumik akineqartut Ataatsimiitaliaq isumaqanngilaq, aqagulu ataatsimiittoqaqqinnissaa tassa nalunaarutigaat.