AUL-imik tunisinermi isumaqatigiissutip imai

Inatsisartut Aningaasaqarnermut Ataasimiititaliaata Arctic Umiaq Linep tunineqarnissaanut akuersipput, umiarsuaatileqatigiiffimmillu piginnittunngortussanngorpoq angalatitsinermik ingerlatseqatigiiffik Arctic Travel Group. Arctic Umiaq Line Arctic Travel Groupip tiguppagu umiarsuit manna tikillugu sinersortaatitut atortut qanoq pineqassappat? Tamanna misissorsimavarput.

Arctic Umiaq Linemik tunisineq pilersaarut malillugu ingerlassappat Arctic Travel Group umiarsuaatileqatigiiffimmik aappaagu apriilip aallaqqaataaniit ingerlatsisunngussaaq.

Ukioq manna sullissinissamik isumaqatigiissutigiissut naapertorlugu sinersortaatit ukiup naaneranut sinersuinnarallassapput, Namminersornerullutik Oqartussanik tapiiffigineqarlutik.

Juullimut ukiortaamullu atatillugu angallassinerit piareerpata januaarip arfineq aappaanni Arctic Umiaq Linep sinersortitsinera unissaaq.

Taava umiarsuit Sarfaq Ittuk aamma Sarpik Ittuk nunatsinnit avalassapput Danmarkimi imaluunniit Norgemi allanngortiterneqariartorlutik.

Sarpik Ittuk allanngortitingaatsiarneqassaaq 17 million koruunit naliginut. Sarpik Ittummi init parnaartartut 26-it amerlineqassapput 46-nngorlugit. Taakku saniatigut inuttat inaat aamma amerlineqassallutik.

Sinersortaatit errorsisarfilerneqassapput immikkullu avammut isikkiveqarluartunik initaliisoqassaaq.

Taava Arctic Travel Group Arctic Umiaq Linemik apriilip aallaqqaataani ingerlatsilivissaaq.

Tamatuma kingorna aallaqqaammut Sarfaq Ittuup ilaasartaatinngornissaa massakkut naatsorsuutigineqarpoq.

Sinersortaatit atii allanngortinneqassappat? Suli paasinngilarput, kisiannili umiarsuaatileqatigiiffiup Arctic Umiaq Linemik ateqarunnaarnissaa kisimi qularnanngilaq.

Imaassinnaavoq tuluttut ateqalersoq Greenland Cruise, immaqa. Sarfaq Ittuk aappaagu ukiakkut allanngortiterneqartussanngortinneqarsimavoq.

Arctic Travel Groupimit aamma pilersaarutigineqarpoq maani ukioraangat sinersortaatit nunanut allanukartinneqartassasut, ilaatigut Sikuiuitsumi Kujallermi Amerika kujalliullu kuussuisa ilaanni Amazonas-imi angalatinneqartassallutik.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat