AUL-imik soqutiginnittut nalilersuipput
Air Greenland aamma Royal Arctic Line Arctic Umiaq Linemik pisiarinnissinnaanerat sapaatip akunnerani matumani aalajangerneqartussanngorpoq.
Arctic Umiaq Linemik tuniniaanermi soqutiginnittut Royal Arctic Line aamma Air Greenland umiarsuaatileqatigiiffimmik pisissanerlutik sapaatip akunnerani matumani aalajangiiffigissagaat, Royal Arctic Linep pisortaanera Jens Andersen ilisimatitsivoq.
Arctic Umiaq Linemik qanoq ililluni pisisinnaaneq Royal Arctic Linemit Air Greenlandimillu ulluni makkunani oqaloqatigiissutigineqarpoq.
Sinersortaatit sinerissami sinersuinnarnissaat Arctic Umiaq Linemit neriuutigineqarpoq.
Aamma sinersortaatip Sarfaq Ittuup pisiarineqarnissaa neriuutigineqarpoq, taamattuttaaq Narsarsuup Ilulissallu akornanni qaammatini apriilip decembarillu akornanni sinersortinneqarsinnaanissaa neriuutigineqarpoq.
Arctic Umiaq Linemik pisinissap qanoq imaqarnissaa isumaqatigiissutigineqarpat tamanna umiarsuaatileqatigiiffiup tunineqarneranik paasineqassanngilaq.
Pisinissamut innersuussutaasut Royal Arctic Linep Air Greenlandillu siulersuisuini pisinissanut aalajangiisartuni suliarineqaqqaartussaassammata.
Arctic Umiaq Line, Royal Arctic Linemit Air Greenlandimillu pisiarineqarsinnaavoq, umiarsuaatileqatigiiffimmilli tuniniaanerup saniatigut tuniniagassat allat tassaapput umiarsuit sinersortaatit marluk, tassalu Sarpik Ittuk aamma Disko II.
