AUL-imik pisiniarneq uppernarsarneqartoq
Arctic Travel Group Arctic Umiaq Linemik pisinissamut Namminersornerullutik Oqartussanut neqerooruteqartoq Namminersornerullutik Oqartussani siulersuisunut allaffeqarfiup pisortaa
Anders Blåbjerg uppernarsaavoq. Pisinissamulli atatillugu neqeroorutit Arctic Travel Groupip siulittaasuanit, Poul Lübbertimit Namminersornerullutillu Oqartussanit sukumiinerusumik suli oqaaseqarfigineqarsinnaanngillat.
Anders Blåbjerg oqarpoq neqeroorutigineqartunik nalilersuisoqaqqaartussaammat neqeroorutigineqartut saqqummiunneqarsinnannngikkallartut. Naliliisoqareerpat Arctic Travel Group oktoberip 30-iutinnagu akissuteqartussaassaaq. Akissuteqarnermi angertoqaranilu naaggaartoqassanngilaq. Pisinissamulli ilumut tunngavissaqartoqarnersoq akissummiissaaq.
Namminersornerullutik Oqartussani siulittaasoqarnermut allaffeqarfik neqeroorummik nalileeqqaassaaq tamatuma kingorna pisortaqarfiit, atorfillit inatsisilerituullu aamma tusarniarneqassapput Naalakkersuisut Arctic Travel Groupimut akissuteqartinnagit.
Arctic Umiaq Line-p pisiarineqarnissaani isumaqatigiinniarneq Naalakkersuisut Arctic Travel Group Inatsisartullu Aningaasaqarnermut Ataatsimiititaliaata akornanni ingerlanneqassaaq. Arctic Umiaq Linelli siulersuisui neqeroorummut aamma oqaaseqartinneqarsinnaassasut, Anders Blåbjerg oqarpoq.
Arctic Umiaq Linemik pisinissamut
Arctic Travel Groupip neqerooruteqarsimanera, Arctic Travel Groupip siulersuisuini siulittaasup Poul Lübbertip ulloqeqqanut radioaviisimi uppernarsarpaa.
Arctic Umiaq Linemik pisinissamut atatillugu neqeroorutiguneqartut immikkuualuttortaat isertuunneqarput, pisinissalli imminut akilersinnaanissaa qularutigineqanngitsoq, Poul Lübbert oqarpoq.
Arctic Umiaq Line Namminersornerullutik Oqartussanit ukiumut 50 millioninik taperneqartarpoq.
Arctic Travel Group umiarsuaatileqatigiffimmik pisissaguni takornariat amerlinissaat naatsorsuutigalugu takornarianik aamma kiffartuussinialersaarpoq.
