Augusta Sallingip pasillerneqarnera nalunaarusianngorluni tunniunneqarpoq

Kommuninik nakkutilliisoqarfik Qeqertarsuup Kommuneanit nalunaarusiamik ualimut tigusaqarpoq. Qeqertarsuarmi borgmesterip Augusta Sallingip pasillerneqarnera nalunaarusianngorluni tunniunneqarpoq.

Pasilliutit AG-mi sapaatip-akunneri marluk matuma siorna saqqummiunneqarput. Qeqertarsuarmi Siumukkut siulittaasuata, Jens Johan Brobergip, pasilliutai aviisimi ilanngunneqarlutik.

Augusta Salling borgmesteriunerminik atornerluisimasutut namminerlu soqutigisaminik salliutitsisarsimasutut pasillerneqarpoq.

Tamatuma kingorna Qeqertarsuarmi kommunalbestyrelse immikkut ittumik ataatsimiippoq. Ataatsimiinnermi tassani borgmesteri tapersersorneqarpoq.

Kommuninik nakkutilliisoqarfiup naammagittaalliortoqanngikkaluartoq suliaq nammineq misissuiffigilerpaa.

Nalunaarusiaq kommunaldirektørimit, Ove Berthelsenimit, allanneqarpoq. Ove Berthelsen Kommune-llu nakkutilliisoqarfianit nalunaarusiaq pillugu oqaaseqartoqarusunngilaq.