Augusta Sallingip naalakkersuisut sakkortuumik uparuarpai

Qasigiannguani efterskoleliornissamut atatillugu ilassutitut aningaasaliissutit tuaviortumik Inatsisartut aningaasaqarnermut ataatsimiititaliaat avaqqutiinnarlugu akuerineqarnerat, illutungiliuttut kisimik assuarinngilaat, aamma naalakkersuisoqatigiinneersoq uparuaavoq.
Allattoq Louise M. Kleemann
septembarip 25-at 2008 14:36

Augusta Salling, Atassummeersoq aamma Inatsisartut Aningaasaqarnermut Ataatsimiititaliaani siulittaasuusoq, ilassutitut aningaasaliisoqarneranut assuarinnilerpoq.

Naalakkersuisoqatigiit inatsisartut ataasinngormat ataatsimiinneranni immikkut ittumik ilassutitut aningaasaliisoqarnissaa akueritippaat, uffa aningaasaqarnermut ataatsimiititaliap suliamut tunngatillugu naalakkersuisunut apeqquteqaatai suli akineqanngitsut.

- Tamanna tunngavigalugu matumami siunnersuutigineqartoq pissusissamisuunngilaq naapertuunnanilu, taamaammat Inatsisartut Aningaasaqarnermut Ataatsimiititaliaata sulineranut akuliunniarneruvoq tulluartuunngitsoq, Augusta Salling oqarpoq.

Siunnersuut akuerineqassappat aarleqquteqarnissaq pissutissaqalernerarpaa, oqarluni ataatsimiititaliani ataasikkaani ilaasortat ataasiakkaat nammineq piumasartik naammassineqanngikkaangat, ileqquulissasoq Inatsisartunut aalajangigassanngortitsiinnartarnissaat.

- Tassunga killittoqassappat Inatsisartut Ataatsimiititaliaasa ataavartut sulinerat toqqammavissaarutsinneqassaaq, taamaattumik inasssutigaara siunnersuut akuerineqassanngitsoq, Augusta Salling oqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq