Augusta Sallingip kræftertut illersorpai

- Inatsisartut amerlanerussuteqarluartut tapersiisimanerat isumaqatigilluinnaqqissaarpara, Augusta Salling oqarpoq.

Taassuma kingumut qiviarluni eqqartorpaa aningaasaqarnermut ataatsimiititaliap naalakkersuisut tamanna pillugu qinnuteqarnerigaluat itigartitsissutigisimagitsik. Tassamigooq Atassutip siunnersuutigisimasaralua itigartitsissutigineqareersimammat.

- Aningaasaqarnermut ataatsimiititaliap itigartitsissutaareersup aningaasalerneqarnissaa akuersissutigisinnaanngilaa, taamaattumik naalakkersuisut periarfissatuarivaat nutaamik Inatsisartuni siunnersuutitut qaqeqqissallugu. Neriuutigiinnarsinnaasimavaallu amerlanerussuteqartut tamatumuunakkut tapersiillutik akuersiumaarnissaat. Tamannalu massakkut pisimavoq taamaattumik periarfissaqalerpoq tamatuma aningaasaliiffiginissaa, Augusta Salling oqarpoq.

Taanna aperaarput taamatut aalajangerneq aningaasatigut qanoq naleqassasorineraa.

- Naalakkersuisut misissuereersimanertik tunngavigalugu aningaasanik aalajangersimasunik qinnuteqarput taava kisianni paasisara najoqqutaralugu siunnersuutip suliarinerata nalaani kræftimik nappaateqartut kisiisa pinnagit. Aammali allanik nappaateqartut ikiorserneqarsinnaajunnaarsimasulli periarfissaqarsinnaasulli nakorsaatinik ikiorserneqarnissaminnik, taakku aamma ilanngunneqarsimapput, Augusta Salling oqarpoq. Erseqqissarpaali tamakku tunngavigalugit aningaasat amerlanerusut atorneqartussanngornerat taava naatsorsuutigineqassasoq.

Nangilluni erseqqissaavoq nappaatit pineqartillugit aningaasat qasserpiaat atorneqartussaanerat oqaatigineqarsinnaasanngitsoq eqqoriaanerilli tunngaviusariaqartartut.

Augusta Salling aamma oqarpoq kræftertut ikiorserneqarnissaat pillugu siunnersuutertik siorna itigartitsissutigineqarmat Hans Enoksen nammineerluni itigartitseqataasimasoq.

Hans Enoksen februaarip qaammataani Ilulissani akerliussutsiminnik takutitsisunut anillappoq kræftertullu pillugit ikiuinissaminik neriorsuuteqarluni.

Ilanngutassiaq Karline Platoumit suliarineqarpoq.