Augusta Salling qinigassanngorteqqinnianngilaq

Kalaallit Nunaanni politikerit nunatsinni nuimanersaasa ilaat, 53-inik ukiulik Augusta Salling, Atassummeersoq, politikimik suliaqarnerminiit tunuarnialerpoq. Sermitsiaq nittartakkamini taama allaaserinnippoq.
marsip 07-at 2008 11:46

- Ukiuni 15-ini politikkimik ingerlataqarpunga, maannalu nukiit suliassanut nutaanut pissanganartunullu atussallugit piffissanngorpoq, Augusta Salling oqarpoq.

Kommunerujussuassanut apriilip 8-anni qinersinissamut Augusta Salling qinigassanngortinnianngilaq, inatsisartunullu tullianik qinersinissamut qinigassanngorteqqinniarnani.

Augusta Salling 1993-imiilli Qeqertarsuarmi kommunalbestyrelsemi ilaasortaasimavoq, 1999-imilu inatsisartunut qinigaalluni.

Borgmesteriusimavoq, Atassummut siulittaasuusimalluni, aningaasaqarnermullu naalakkersuisuusimalluni.

Borgmesterit allat qinigassanngorteqqinniarnatik nalunaaruteqartut tassaapput Paamiuni borgmesteri Lars Sørensen, Inuit Ataqatigiinneersoq, Maniitsup borgmesteria Søren Lyberth, Siumumeersoq, Uummannamilu borgmesteri Jens Lars Fleischer, Siumumeersoq.