Augusta Salling: Naalakkersuisut Pisortarlu naqqiisariaqarput

- Nassuiaatissaqaraluarunilluunniit Nunatsinni avaartaalluni puisinniartannginnissaq aalajangiusimagipput, Naalakkersuisut avammut piaartumik nalunaarutigisariaqarpaat.

Aalisarnermut Piniarnermullu Pisortaqarfimmi pisortap Amalie Jessenip TV-avisimi oqaaseqarsimanera,

Nunatsinni iluanaarutigalugu misiligummik puisinniartitsinissamik Great Greenlandip qinnuteqarsimaneranik imaqartoq tunngavigalugu, Atassut sinnerlugu Inatsisartuni ilaasortaq Augusta Salling taama piumasaqarpoq.

- TV-avisimik uagut isiginnaarlutalu tusarnaartugut paatsuugassanngitsumik, isumaqarpunga, tusaavarput, piosrtap Amalie Jessenip oqaasii, killorneqanngitsutut isikkoqarput, killorneqarsimagaluarunilluunniit, ersarippoq oqaasia; taamatut Nunatsinni anaaleraluni piniartoqarsinnaanersoq misissorneqaqqaassasoq tamatumalu kingornatigut Naalakkersuisut tamanna isummerfigiumaaraat.

Augusta Salling oqarpoq oqaaseq taanna piniartortatsinnut innarleereersoq.

- Tassami avatitsinni siutit isillu annertoorujussuarmik Nunatsinnut isigipput, taamaattumik Namminersornerullutik Oqartussat pisortaqarfianiit oqariartuuteqarneq ingerlaannaavilluni soorunami tiguneqarpoq isummersorfigineqalereerlunilu.

Taamaattumik pisortaq taama siunertaqartoqannginneranik piaarnerpaamik erseqqissaateqaqqullugu Naalakkersuisoqarfimmiit peqquneqartariaqartoq Augusta Salling oqarpoq.

- Piniartortavut illersussallugit Naalakkersuisut aamma aalajangiusimagunikku, taava qangaaniilli piniariaaseq eriagalugu sulinertik ingerlateqqittariaqarpaat.

Naalakkersuisut nassuiaapput, Great Greenlandimit erseqqissaatigineqartoq, iluanaarutigalugu puisinniartoqassappat, Norgemiut puisinniartariaasiat malikannerlugu, tassa aallaareeraanni nangittariaqarpat nalileqqaarlugu aatsaat avaarsisoqarsinnaasoq. Tamanna Augusta Sallingip nalilerpaa:

- Norgemiut massakkut taama ingerlatsinerat; tassa aallaagaluariarlugu anaallugu toqutsisarnerat, taassuma isiginiarneqarnera annertoorujussooreerpoq, taamaattumik isumaqarpunga anaalerut akuutillugu puisinniarnerup ingerlanneqalernissaanik misissuisinnaaneq unittariaqartoq.

Augusta Sallingip Finn Karlsen piumsaqarfigaa.

- Naalakkersuisup pisortani peqqusariaqarpaa naqqiissuteqaqqullugu, tassungalu tunngasortai kinguarsarnertaqanngitsumik piaarnerpaamillu isummerfigineqartariaqarput aammalu naaleraluni puisinniartarnerup Nunatsinnut eqqunneqannginnissaa, Naalakkersuisut erseqqissartariaqarpaat.

Augusta Salling erseqqissaavoq, apeqqut pingaaruteqaqimmat Atassummi isumaqatigiissanngikkaluarunilluunniit oqalliseqataanissartik inissaqartariaqartoq.