Augusta Salling kommunalbestyrelsit illerpaat

Qeqertarsuarni borgmesteri Augusta Salling, borgmesteritut sulinermini nammineq inuttut, uimilu inuussutissarsiornermi soqutigisaanik salliutitsisarsimasutut Qeqertarsuarmi kommunalbestyrelimi ilaasortamit ataatsimit, aamma Demokraatit siuttuannit, Per Berthelsenimit pasillerneqarpoq. AG-mi kingullermik saqqummersumi taama allassimasoqarpoq.

Borgmesterimut pasilliineq tunngavissaqanngilluinnartoq Qeqertarsuarmi kommunalbestyrelsimut ilaasortat amerlanerussuteqarlutik maanna tutsiupput oqarlutik, borgmesterimut pasilliineq tunngavissaqanngilluinnartoq.

- Paasisakka najoqqutaralugit kommunalbestyrelsimi ilaasortani arfineq-marluusuni arfinillit taperserpaannga, aammalu ataaseq taaseqataasimanngilaq pasilliisumut sinniisussatut inissisimanini pissutigalugu. Taanna naliliisimaneq pissusissamisoorluinnartutut oqaatigisariaqarpara, naatsorsuutigisimavarami kommunalbestyrelsip tapersissagaanga pasilliutinimi pisuussuteqanngilluinnarama, Augusta Salling oqarpoq.

Taanna aperaarput, kikkut pasilliisimasoralugit.

- Amerlasuut ilisimalereerunagaattut kommunalbestyrelsimi ilaasortaasoq Siumumeersoq Jens Johan Broberg Siumut siulittaasuatut atsiorluni taamatut pasilliinernik sakkortoorujussuarnik pingasunik saqqummiussivoq, taassuma saniatigut Demokraatit nuna tamakkerlugu siulittaasuat Per Berthelsen pisuutitsivoq; uangagooq nammineq inuttut aningaasaatikka pisortallu aningaasaataat immikkoortissinnaanngisarnikuugikka. Taama pisuutinneqarneq sakkortoorujussuuvoq, taamaattumik suliassaq tassunga killitsinneqarnavianngilluinnaqqissaarpoq! Augusta Salling oqarpoq.

Augusta Sallingip pasillerneqarnini sinnganermik aallaaveqarsoraa, nammineerlunilu kommunalbestyrelsimi ilaasortat qinnuigisimavai immikkut ittumik ataatsimeeqqullugit pasilliinerillu nalilersoqqullugit.

- Assorujorujussuaq ajorpoq taama pasillerneqarluni, kommuni aningaasatigut ingerlanneqarnermigullu assut ajortumik inissisimalersimasoq nukippassuit atorlugit qanoq iliuuseqarnikuulluni, kommunalbestyrelsimi ilaasortaqatikka peqatigalugit sulisimalluni, massakkullu ilorraap tungaanut sangutissimallugu, taava pasilliutinik taama sakkortutigisunik, nuanniilluinnartigisunik, pineqarluni assorujussuaq ajorpoq. Augusta Salling oqarpoq.

Nangipporlu:

- Oqaatigisariaqarpara suliaq tassunga killinnavianngitsoq, inuit taama pasilliillutik- imaluunniit pasilliiginnanngillat - aamma toqqaannartumik oqarput, ima peqquserluuteqarsimasunga. Taakku qaquguluunniit inoqatiminnut taamatut peqqittussaajunnaarlugit anguniarlugu soorunami suliamik ingerlatitsissaanga, aamma eqqartuussissuserisumik oqaloqateqareerpunga, misissorlugulu periarfissallu massakkut misissorlugit ingerlanneqarnerat aallartereerpoq, Augusta Salling oqarpoq.

Jens Johan Broberg attaviginiaraluaratsigu iluatsinngilarput.